ഇലക്ട്രിക്ക് വാഹന നിര്മ്മാതാക്കളായ ഒല തങ്ങളുടെ വരാനിരിക്കുന്ന പുത്തൻ ഇലക്ട്രിക് കാറുകളെ പരിചയപ്പെടുത്തുകയാണ്. അതിനായി അവർ കാറുകളുടെ ടീസറുകൾ പുറത്തിറക്കി എന്നാണ് ലഭിക്കുന്ന വിവരങ്ങൾ. ഈ വിവരങ്ങൾ പങ്കുവെയ്ക്കുന്നത് ഓട്ടോ കാര് ഇന്ത്യയാണ്. കമ്പനി അവതരിപ്പിക്കാനിരിക്കുന്ന ഇലക്ട്രിക് കാറുകളുടെ ഒരു ടീസർ ഒല സിഇഒ ഭവിഷ് അഗർവാള് ട്വിറ്റ് ചെയ്തുവെന്നാണ് ഓട്ടോ കാര് ഇന്ത്യ റിപ്പോര്ട്ട് ചെയ്യുന്നത്. തമിഴ്നാട്ടിലെ കൃഷ്ണഗിരിയില് സംഘടിപ്പിച്ച ഒല കസ്റ്റമര് ഡേ പരിപാടിയിയിലാണ് കാറുകളെപ്പറ്റി ഒല പ്രഖ്യാപനം നടത്തിയതെന്നാണ് വിവരം.
ഈ വാഹന മോഡലുകള് എല്ലാം സെഡാന് ആയിരിക്കും എന്നാണ് റിപ്പോര്ട്ടുകള്. ആദ്യം പ്രദർശിപ്പിച്ച കാറിന് ചെറിയ ബോണറ്റും റാപ്പറൗണ്ട് എഫക്റ്റുള്ള ഹെഡ്ലൈറ്റുകളുമുണ്ട്. പിൻഭാഗം കിയ EV6 പോലെയുള്ള മുഴുനീള ടെയിൽ-ലൈറ്റുകളുള്ള ഒരു സ്റ്റബി ബൂട്ടിന്റെ സൂചന നൽകുന്നുണ്ട്. ഒലയുടെ വരാനിരിക്കുന്ന ഇലക്ട്രിക് കാറുകൾക്കെല്ലാം മനോഹരമായ മുൻ വശമാണ് നൽകിയിരിക്കുന്നത്. ഒപ്പം മനോഹരമായ സ്വൂപ്പിംഗ് റൂഫ്ലൈനും നൽകിയിരിക്കുന്നു.
പരിപാടിയിൽ പ്രദർശിപ്പിച്ച കാറുകൾക്ക് യു ആകൃതിയിലുള്ള ഹെഡ് ലാമ്പുകൾ നൽകിയിരിക്കുന്നതോടൊപ്പം മദ്ധ്യഭാഗത്ത് വൃത്താകൃതിയിൽ എൽഇഡി ലൈറ്റും ഘടിപ്പിച്ചിരിക്കുന്നു. വാഹനത്തിന് പിന്നിൽ നീളത്തിൽ എൽഇഡി ലൈറ്റുകളും ഉൾപ്പെടുത്തിയിരിക്കുന്നു. പരിപാടിയിൽ പ്രദർശിപ്പിച്ച ടീസറിന്റെ വിവരങ്ങൾ അല്ലാതെ കാറുകളുടെ മറ്റ് വിശദാംശങ്ങളൊന്നും കമ്പനി പുറത്ത് വിട്ടിട്ടില്ല. എന്നിരുന്നാലും, 2022 ഓഗസ്റ്റ് 15-ന് കൂടുതൽ വിവരങ്ങൾ വെളിപ്പെടുത്തുമെന്ന് സിഇഒ ഭവിഷ് അഗർവാൾ സ്ഥിരീകരിച്ചിരിക്കുന്നത്. 2023-ൽ കാറുകൾ വിപണിയിലെത്തിക്കാനുള്ള ശ്രമത്തിലാണ് ഒല. 2020 ഓഗസ്റ്റ് 15 നാണ് ഒലയുടെ ഇലക്ട്രിക് സ്കൂട്ടറുകള് അവർ ഇന്ത്യയില് അവതരിപ്പിച്ചത്. എസ് വണ്, എസ് വണ് പ്രോ എന്നീ രണ്ട് വേരിയന്റുകളുമായാണ് വിപണിയില് അരങ്ങേറ്റം കുറിച്ചത്.
Comments