ഷില്ലോംഗ്: എന്ഡിഎയുടെ രാഷ്ട്രപതി സ്ഥാനാര്ത്ഥിയായി ഗോത്രവര്ഗ്ഗ വനിത ദ്രൗപതി മുര്മുവിനെ തിരഞ്ഞെടുത്തില് പ്രധാനമന്ത്രിക്ക് അഭിനന്ദനം അറിയിച്ച് മേഘാലയ മുഖ്യമന്ത്രി കോണ്റാഡ് സാങ്മ .രാഷ്ട്രപതി സ്ഥാനാര്ത്ഥിക്കും മംഗളാശംസകള് നേര്ന്നു. രാജ്യത്തിനു വേണ്ടി ഗോത്രവര്ഗ രാഷ്ട്രപതി എന്നത് പിതാവും മേഘാലയ മുന് മുഖ്യമന്ത്രിയുമായ പൂര്ണോ അജിതോക് സാങ്മയുടെ സ്വപ്നമായിരുന്നെന്ന് അദ്ദേഹം പറഞ്ഞു.
ബിജെപി ദേശീയ അദ്ധ്യക്ഷ്യന് ജെ പി നദ്ദയാണ് ദ്രൗപതി മുര്മുവിനെ രാഷ്ട്രപതി സ്ഥാനാര്ത്ഥിയായി പ്രഖ്യാപിച്ചത്. 20 പേരുടെ പട്ടികയില് നിന്നാണ് മുര്മുവിനെ തിരഞ്ഞെടുത്തത്. കിഴക്കെ ഇന്ത്യയില് നിന്നുള്ള ഗോത്രവര്ഗ വനിത ആവണം രാഷ്ട്രതി സ്ഥാനാര്ത്ഥി എന്ന തീരുമാനത്തിനൊടുവിലാണ് മുര്മുവിനെ തിരഞ്ഞെടുത്തത്.
താഴെ തട്ടിലുള്ളവരെ ശാക്തീകരിക്കുന്നതില് ജീവിതം സമര്പ്പിച്ച വ്യക്തിയാണ് ദ്രൗപതി മുര്മുവെന്ന് പ്രധാനമന്ത്രി പറഞ്ഞു. ഗോത്രവിഭാഗങ്ങള്ക്കിടയില് വിദ്യാഭ്യാസത്തെക്കുറിച്ചുള്ള അവബോധം സൃഷ്ടിക്കാനുള്ള പ്രവര്ത്തനങ്ങളിലൂടെ സമൂഹത്തില് പ്രത്യേക സ്ഥാനം നേടിയെടുത്ത വ്യക്തിയാണെന്ന് ആഭ്യന്തര മന്ത്രി അമിത് ഷാ പറഞ്ഞു. മുര്മുവിന്റെ സ്ഥാനാര്ത്ഥിത്വം മുഴുവന് ഗോത്രവിഭാഗത്തിനുള്ള ആദരമാണെന്നും കേന്ദ്രമന്ത്രി കിരണ് റിജിജ്ജു പറഞ്ഞു.
മുര്മു തീര്ച്ചയായും വിജയിക്കുമെന്ന ആത്മവിശ്വാസത്തിലാണ് നേതാക്കള്.
ബിജെപിയുടെ മുതിര്ന്ന നേതാവും, ഝാര്ഖണ്ഡിന്റെ ആദ്യ ഗോത്രവര്ഗ വനിത ഗവര്ണറുമായിരുന്നു മുര്മു. ജൂലൈ 18 ന് നടക്കുന്ന തിരഞ്ഞെടുപ്പില് തൃണമൂല് കോണ്ഗ്രസ് നേതാവ് യശ്വന്ത് സിന്ഹയാണ് എതിര് സ്ഥാനാര്ത്ഥി.
