ന്യൂഡല്ഹി: എന്ഡിഎയുടെ രാഷ്ട്രപതി സ്ഥാനാര്ത്ഥി ദ്രൗപതി മുര്മുവിന് ഇസഡ് പ്ലസ് സുരക്ഷ നല്കി കേന്ദ്ര റിസര്വ് പോലീസ് സേന (സിആര്പിഎഫ്). കേന്ദ്ര ആഭ്യന്തര മന്ത്രലയത്തിന്റെ നിര്ദേശപ്രകാരം ബുധനാഴ്ച രാവിലെ മുതലാണ് സുരക്ഷ വര്ധിപ്പിച്ചത്.
ബിജെപിയുടെ മുതിര്ന്ന നേതാവും, ഝാര്ഖണ്ഡിന്റെ ആദ്യ ഗോത്രവര്ഗ വനിത ഗവര്ണറുമായിരുന്നു മുര്മു. അഞ്ച് വര്ഷക്കാലാവധി പൂര്ത്തിയാക്കുന്ന ആദ്യ ഝാര്ഖണ്ഡ് ഗവര്ണര് എന്ന പദവിയും മുര്മുവിന്റെ പേരിലാണ്. പ്രസിഡന്റ് നാമനിര്ദേശ പട്ടികയില് കഴിഞ്ഞ തവണയും മുര്മുവിന്റെ പേര് നിര്ദേശിച്ചിരുന്നു.
ജൂലൈ 18 ന് നടക്കുന്ന തിരഞ്ഞെടുപ്പില് വിജയിച്ചാല് ഗോത്രവര്ഗവിഭാഗത്തില് നിന്നുള്ള ആദ്യ രാഷ്ട്രപതിയും രണ്ടാമത്തെ വനിതാ രാഷ്ട്രപതിയും ആയിരിക്കും ദ്രൗപതി.
റായ് രംഗപൂരിലെ കൗണ്സിലര് തിരഞ്ഞെടുപ്പിലൂടെയാണ് രാഷ്ട്രീയ ജീവിതം ആരംഭിക്കുന്നത്. 2000 ത്തില് നിയമസഭ തിരഞ്ഞെടുപ്പില് വിജയിച്ചു. ഝാര്ഖണ്ഡിന്റെ ഗവര്ണര് പദവിയില് 2015 മുതല് 2021 വരെ തുടര്ന്നു.
