കുട്ടികളെയും മുതിർന്നവരെയും ഒരുപോലെ കൺഫ്യൂഷനടിപ്പിക്കുന്ന ”തൊള്ളായിരവും ഒമ്പതിനായിരവും”

സ്‌കൂളിൽ പഠിക്കുന്ന കാലം മുതൽക്കെ നാമെല്ലാവരും വായിക്കാൻ പ്രയാസപ്പെടുന്ന ചില സംഖ്യകളുണ്ട്. തൊള്ളായിരത്തിനും (900) ആയിരത്തിനും ഇടയിലുള്ള സംഖ്യകളും ഒമ്പതിനായിരത്തിനും (9,000) പതിനായിരത്തിനും ഇടയിലുള്ള സംഖ്യകളുമാണ് ഇത്തരത്തിൽ വായനക്കാരെ കുഴപ്പിക്കുന്നത്. എത്ര തന്നെ പഠിച്ചാലും പിന്നെയും പിന്നെയും കുഴപ്പിക്കുന്നവനാണ് ഈ അക്കം

കുട്ടികൾ, വിദ്യാർത്ഥികൾ, മുതിർന്നവർ, എന്തിനേറെ ഒട്ടുമിക്ക അദ്ധ്യാപകർ പോലും നേരിടുന്ന പ്രശ്‌നമാണിത്. ന്യൂസ് ചാനലിൽ വാർത്ത വായിക്കുന്ന അവതാരകർ പലപ്പോഴും ഒമ്പത് വെച്ച് തുടങ്ങുന്ന നാലക്ക സംഖ്യകളെ ‘തൊള്ളായിരത്തി’ എന്ന് വായിച്ച് നിരവധി തവണ തെറ്റിക്കുന്നത് നാം ലൈവായി കണ്ടിട്ടുണ്ട്. അതുപോലെ വിശിഷ്ട സ്ഥാനങ്ങളിലും മന്ത്രി പദങ്ങളിലും ഇരിക്കുന്നവർ പോലും ഇത്തരത്തിൽ അബദ്ധം പറയാറുണ്ട്.

എന്തുകൊണ്ടാണ് ‘ഒമ്പതിനായിരത്തിനെ’ പലപ്പോഴും ‘തൊള്ളായിരമെന്ന്’ തെറ്റിപ്പറയാൻ കാരണമെന്ന് നോക്കാം..

നൂറ് കഴിഞ്ഞാലുള്ള മൂന്നക്ക സംഖ്യകളെ നൂറ്റി, ഇരുന്നൂറ്റി, മുന്നൂറ്റി എന്നിങ്ങനെയാണ് പറയുക. എണ്ണൂറ്റി വരെ ഇത് തെറ്റാതെ വായിക്കാൻ എളുപ്പമാണുതാനും. 899-ന് ശേഷം വരുന്ന 900 (തൊള്ളായിരം) എന്ന സംഖ്യ എത്തുന്നതോടെയാണ് കൺഫ്യൂഷന് തുടക്കമിടുന്നത്. കാരണം ഒന്ന് മുതൽ എട്ട് വരെയുള്ള സംഖ്യകളെ വായിക്കുമ്പോൾ അതിൽ രണ്ട് അക്ഷരങ്ങൾ മാത്രമാണുള്ളത്. എന്നാൽ എട്ട് കഴിഞ്ഞ് ഒമ്പത് വരുമ്പോൾ അത് വായിക്കാൻ മൂന്ന് അക്ഷരങ്ങൾ ഉപയോഗിക്കുന്നു. ഇതുകൊണ്ടാണ്, എണ്ണൂറ്റിതൊണ്ണൂറ്റിഒമ്പത് (899) വരെ ആശയക്കുഴപ്പില്ലാതെ വായിക്കാൻ സാധിക്കുന്നതും അതുകഴിഞ്ഞുള്ള സംഖ്യകൾ വായിക്കുമ്പോൾ ഒന്ന് ചിന്തിക്കേണ്ടി വരുന്നതും.

ഇനി അതിൽ കൂടുതൽ കൺഫ്യൂഷനടിപ്പിക്കുന്ന അക്കമാണ് ഒമ്പതിൽ തുടങ്ങുന്ന നാലക്ക സംഖ്യകൾ. അതായത് 8,999 (എണ്ണായിരത്തി തൊള്ളായിരത്തി തൊണ്ണൂറ്റി ഒമ്പത്) കഴിഞ്ഞാൽ അടുത്തതായി വരുന്ന സംഖ്യ മുതൽ പതിനായിരം എത്തുന്നതുവരെയുള്ള സംഖ്യകൾ മിക്കവരെയും പ്രതിസന്ധിയിലാക്കാറുണ്ട്. ആയിരത്തിന് ശേഷം വരുന്ന സംഖ്യകളെ ആയിരത്തി, രണ്ടായിരത്തി, മൂവായിരത്തി, നാലായിരത്തി.. എന്നിങ്ങനെയാണ് വായിക്കുക. എണ്ണായിരത്തി വരെ ഇത്തരത്തിൽ വായിക്കാൻ പ്രയാസമുണ്ടാകാറില്ല. എന്നാൽ എട്ട് കഴിഞ്ഞാൽ വരുന്ന മൂന്ന് അക്ഷരങ്ങളുള്ള ഒമ്പത് എന്ന സംഖ്യ അവിടെയും പുലിവാല് പിടിപ്പിക്കുകയാണ്. എണ്ണായിരത്തി കഴിഞ്ഞാൽ പിന്നെ വരുന്നത് ‘ഒമ്പതിനായിരത്തി’ എന്നാണ്. പക്ഷേ ‘എണ്ണായിരത്തി’ എന്ന് പറയുന്നതിന് സമാനമായി ‘തൊള്ളായിരത്തി’ എന്ന് പറയാൻ വായനക്കാരനെ പ്രേരിപ്പിക്കുന്നു. ഇതോടെ സംഖ്യ എത്ര തന്നെയായാലും വായിക്കുമ്പോൾ തെറ്റുന്നു.

എങ്ങനെ ഈ പ്രതിസന്ധിയെ പരിഹരിക്കാം എന്ന് ചോദിച്ചാൽ രണ്ട് വഴികളുണ്ടെന്നാണ് ഉത്തരം. ഒമ്പത് വെച്ച് തുടങ്ങുന്ന സംഖ്യകളെ (ഉദാഹരണമായി 9,123 9,999, 9,540 ) കണ്ടുകഴിഞ്ഞാൽ ആദ്യം ശ്രദ്ധിക്കേണ്ടത് എത്ര സംഖ്യകൾ അവയിലുണ്ടെന്നാണ്. സംഖ്യകളെഴുതുമ്പോൾ കൃത്യമായി കോമ ഉപയോഗിച്ചിട്ടുണ്ടെങ്കിൽ എത്ര അക്കങ്ങളുണ്ടെന്ന് പെട്ടെന്ന് തിരിച്ചറിയാം. നാല് സംഖ്യകളുണ്ടെന്ന് സ്ഥിരീകരിച്ചാൽ അത് ഒമ്പതിനായിരത്തി എന്ന് തുടങ്ങണമെന്ന് മനസിലാക്കുക. ഇക്കാര്യം മനഃപാഠമാക്കിയാൽ ഒരു പരിധി വരെ ഒമ്പതിനായിരവും തൊള്ളായിരവും കുഴപ്പിക്കുന്നത് പരിഹരിക്കാവുന്നതാണ്. ഇതിന് സാധിക്കാത്തവർ അക്കങ്ങളിലെഴുതാതെ അക്ഷരങ്ങളായി സംഖ്യ എഴുതി വായിക്കേണ്ടതാണ്.