പത്തനംതിട്ട: സംസ്ഥാനത്ത് കൊറോണയ്ക്ക് മുൻപുണ്ടായിരുന്ന കൂടുതൽ പാസഞ്ചർ ട്രെയിനുകൾ പുനസ്ഥാപിക്കുന്നു. കൊല്ലം-എറണാകുളം മെമു(കോട്ടയം വഴി), എറണാകുളം-കൊല്ലം മെമു(ആലപ്പുഴ വഴി), കൊല്ലം-ആലപ്പുഴ-കൊല്ലം പാസഞ്ചർ, കൊച്ചുവേളി-നാഗർകോവിൽ പാസഞ്ചർ എന്നിവ ജൂലൈ 11നും ഷൊർണൂർ-തൃശൂർ പാസഞ്ചർ ജൂലൈ 3 മുതലും തൃശൂർ-കണ്ണൂർ പാസഞ്ചർ ജൂലൈ 4 മുതലും സർവീസ് ആരംഭിക്കും.
അൺറിസർവ്ഡ് എക്സ്പ്രസ് ആയിട്ടായിരിക്കും പാസഞ്ചർ ട്രെയിനുകൾ പുനസ്ഥാപിക്കുന്നത്. എക്സ്പ്രസ് നിരക്ക് ബാധകമായിരിക്കുമെങ്കിലും കൗണ്ടറുകളിൽ നിന്ന് ടിക്കറ്റ് ലഭിക്കും. രാവിലെ 8.20ന് കൊല്ലത്ത് നിന്ന് പുറപ്പെടുന്ന കോട്ടയം വഴിയുള്ള മെമു ഉച്ചയ്ക്ക് 12.30ന് എറണാകുളത്ത് എക്കും. എറണാകുളത്ത് നിന്ന് രാത്രി 8.10ന് പുറപ്പെട്ട് ആലപ്പുഴ വഴി 11.35ന് കൊല്ലത്ത് എത്തും. രണ്ട് സർവീസുകളും ബുധനാഴ്ചകളിൽ ഉണ്ടാകില്ല.
കൊല്ലം-ആലപ്പുഴ അൺറിസർവ്ഡ് എക്സ്പ്രസ് ഞായർ ഒഴികെയുള്ള ദിവസങ്ങളിൽ രാവിലെ 9.05ന് കൊല്ലത്ത് നിന്ന് പുറപ്പെട്ട് 11.45ന് ആലപ്പുഴയിലെത്തും. തിരികെ ഉച്ചയ്ക്ക് 1.50ന് ആലപ്പുഴയിൽ നിന്ന് പുറപ്പെട്ട് 3.45ന് കൊല്ലത്ത് എത്തും. നാഗർകോവിൽ-കൊച്ചുവേളി അൺറിസർവ്ഡ് എക്സ്പ്രസ് രാവിലെ 7.55ന് പുറപ്പെട്ട് രാവിലെ 10.10ന് കൊച്ചുവേളിയിലെത്തും. തിരികെ ഉച്ചയ്ക്ക് 1.40ന് കൊച്ചുവേളിയിൽ നിന്ന് പുറപ്പെടുന്ന ട്രെയിൻ 4.25ന് നാഗർകോവിലിൽ എത്തും
Comments