തിരുവനന്തപുരം: മന്ത്രി മുഹമ്മദ് റിയാസിന് നേരെയും ആരോഗ്യമന്ത്രി വീണാ ജോർജ്ജിന് നേരെയും കരിങ്കൊടി കാണിച്ച് കോൺഗ്രസിന്റെ പ്രതിഷേധം. രാഹുൽ ഗാന്ധിയുടെ ഓഫീസ് അടിച്ചുതകർത്തതിലുള്ള കോൺഗ്രസിന്റെ പ്രതിഷേധമാണ് മന്ത്രിമാർക്ക് നേരെയും ഉയർന്നത്.
കിളിമാനൂരിൽ വെച്ചായിരുന്നു പൊതുമരാമത്ത് വകുപ്പ് മന്ത്രി മുഹമ്മദ് റിയാസിന് നേരെ മഹിള കോൺഗ്രസ് നേതാവ് കരിങ്കൊടി കാണിച്ചത്. കൊച്ചുപാലം പുനർനിർമ്മാണത്തിന്റെ ഉദ്ഘാടനത്തിന് മന്ത്രി എത്തിയപ്പോഴായിരുന്നു സംഭവം. തുടർന്ന് മഹിള കോൺഗ്രസ് നേതാവ് ദീപ അനിൽ അറസ്റ്റിലായി.
ആരോഗ്യമന്ത്രി വീണ ജോർജ് നേരെ പത്തനംതിട്ടയിലായിരുന്നു പ്രതിഷേധക്കാർ കരിങ്കൊടി കാണിച്ചത്. പത്തനംതിട്ട അങ്ങാടിക്കലിൽ എത്തിയ മന്ത്രിയെ കോൺഗ്രസ് പ്രവർത്തകർ കരിങ്കൊടി കാട്ടുകയായിരുന്നു. തുടർന്ന് യൂത്ത് കോൺഗ്രസ് ജില്ലാ പ്രസിഡന്റ് എംജി കണ്ണൻ ഉൾപ്പെടെയുള്ള നേതാക്കളെ കൊടുമൺ പോലീസ് അറസ്റ്റ് ചെയ്ത് നീക്കി.
രാഹുൽ ഗാന്ധിയുടെ ഓഫീസ് എസ്എഫ്ഐ ആക്രമിച്ച കേസിൽ ആരോഗ്യമന്ത്രിയുടെ പേഴ്സണൽ സ്റ്റാഫഗം അവിഷിത്ത് പ്രതിയായതോടെയാണ് വീണാ ജോർജ്ജിനെതിരെയും പ്രതിഷേധം കനത്തത്.
