നടൻ ജോണി ഡെപ്പിനോട് മാപ്പ് പറഞ്ഞ് പ്രമുഖ സിനിമാ സ്റ്റുഡിയോയായ ഡിസ്നി. മുൻ ഭാര്യയും ബോളിവുഡ് നടിയുമായ ആംബർ ഹേഡിനെതിരായ മാനനഷ്ടക്കേസിൽ നടൻ ജോണി ഡെപ്പ് വിജയിച്ചതോടെയാണ് മാപ്പ് പറഞ്ഞ് ഡിസ്നി രംഗത്ത് വന്നിരിക്കുന്നത്. മാപ്പ് അപേക്ഷിച്ച് ഡിസ്നി ജോണി ഡെപ്പിന് കത്തയച്ചതായാണ് പുറത്ത് വരുന്ന റിപ്പോർട്ടുകൾ. മാപ്പ് അപേക്ഷിക്കുക മാത്രമല്ല, 2535 കോടി രൂപയുടെ ഒരു കരാർ ഓഫറും സിനിമാ സ്റ്റുഡിയോ നടന് മുമ്പിൽ വെച്ചിട്ടുണ്ട്.
2017 ൽ വിവാഹ മോചനത്തിന് പിന്നാലെ 2018 ൽ വാഷിങ്ടൺ പോസ്റ്റിൽ ആംബർ ഹേഡ് എഴുതിയ ലേഖനത്തോട് കൂടിയായിരുന്നു പ്രശ്‌നങ്ങളുടെ തുടക്കം. ജോണി ഡെപ്പ് ലഹരിക്കടിമയാണെന്നും തനിക്ക് നേരിടേണ്ടി വന്നത് വലിയ പീഡനങ്ങളാണെന്നും പറഞ്ഞുകൊണ്ടുള്ള ലേഖനത്തോടെ ജോണി ഡെപ്പിനെ സിനിമലോകം മാറ്റി നിർത്തി. ഡിസ്നി അടക്കമുള്ള കമ്പനികൾ ഡെപ്പിന് വിലക്ക് ഏർപ്പെടുത്തി. എന്നാൽ കേസിൽ വിജയിച്ചതോടെ ഡിസ്നി തങ്ങളുടെ തെറ്റ് തിരുത്തി രംഗത്ത് വന്നിരിക്കുകയാണ്.
ജോണി ഡെപ്പിന്റെ ഏറ്റവും വലിയ ഹിറ്റുകളിൽ ഒന്നായിരുന്നു പൈറേറ്റ്സ് ഓഫ് കരീബിയൻ. ലോകമെമ്പാടും ടെപ്പിന് ആരാധകരെ സൃഷ്ടിച്ച ഈ ചിത്രത്തിലെ കേന്ദ്ര കഥാപാത്രമായ ക്യാപ്റ്റൻ ജാക്ക് സ്പാരോ ആയി തിരികെവരണമെന്നാണ് ഡിസ്നി മുന്നോട്ട് വെച്ചിരിക്കുന്ന ആവശ്യം. പൈറേറ്റ്സ് ഓഫ് കരീബിയൻ സിനിമാ പരമ്പരയിലെ ആറാം ചിത്രത്തിനുവേണ്ടിയും, സിനിമയുടെ ഡിസ്നി പ്ലസ് സ്പിൻ ഓഫ് സീരീസിനുമായാണ് സ്റ്റുഡിയോ ഇപ്പോൾ ഡെപ്പിനെ സമീപിച്ചിരിക്കുന്നത്. എന്നാൽ റിപ്പോർട്ട് സംബന്ധിച്ച് ഔദ്യോഗിക സ്ഥിരീകരണങ്ങൾ വന്നിട്ടില്ല. ഡിസ്നി 300 മില്ല്യൺ ഡോളർ നൽകിയാലും താൻ ഇനി ഒരു പൈറേറ്റ്സ് ഓഫ് കരീബിയൻ സിനിമയിൽ അഭിനയിക്കില്ലെന്ന് ഡെപ്പ് നേരത്തെ പറഞ്ഞിരുന്നു.
