കൊച്ചി: സിനിമ സെറ്റുകളിലെ ആഭ്യന്തര പരാതി പരിഹാര സെൽ രൂപീകരിച്ചു. ഫിലിം ചേബറിന്റെ നേതൃത്വത്തിൽ ചേർന്ന സിനിമാ സംഘടനകളുടെ യോഗത്തിലാണ് ഇതുസംബന്ധിച്ച തീരുമാനമുണ്ടായത്.
27 പേരടങ്ങുന്ന മോണിറ്ററിംഗ് കമ്മിറ്റിക്കാണ് രൂപം നൽകിയത്. ഒമ്പത് സംഘടനകളിൽ നിന്നായി മൂന്ന് വീതമാളുകളെ ഉൾപ്പെടുത്തിയാണ് കമ്മിറ്റിയുടെ രൂപീകരണം. ഫിലിം ചേംബർ പ്രസിഡന്റായിരിക്കും കമ്മിറ്റിയുടെ അദ്ധ്യക്ഷൻ.
അമ്മ സംഘടനയിൽ നിന്ന് ബാബുരാജ്, സുരേഷ് കൃഷ്ണ, ദേവീ ചന്ദന എന്നിവരെയാണ് തിരഞ്ഞെടുത്തത്. ഡബ്ല്യൂസിസിയിൽ നിന്ന് സജിത മഠത്തിൽ, ദിവ്യ ഗോപിനാഥ്, ജോളി ചിറയത്ത് എന്നിവരെയും തിരഞ്ഞെടുത്തു. ഫിലിം ചേംബറിന്റെ അദ്ധ്യക്ഷതയിൽ ഇന്ന് വൈകീട്ട് മൂന്ന് മണിക്കായിരുന്നു ഇക്കാര്യം ചർച്ച ചെയ്യാൻ യോഗം ചേർന്നത്.
ഓരോ സിനിമ സെറ്റിലും ഇനി ആഭ്യന്തര പരാതി പരിഹാര സെൽ ഉണ്ടാകും. നാല് പേരടങ്ങുന്നതാണ് സെല്ലെന്നും ഇവയുടെ പ്രവർത്തനം ഒരു മാസത്തിനകം തുടങ്ങുമെന്നും യോഗം അറിയിച്ചു. ഈ സെല്ലുകളുടെ പ്രവർത്തനം നിരീക്ഷിക്കാനാണ് 27 പേരടങ്ങുന്ന മോണിറ്ററിംഗ് കമ്മിറ്റിക്ക് രൂപം നൽകിയിരിക്കുന്നത്.
