മ്യൂണിക്: ജി-7 ഉച്ചകോടിയിൽ പങ്കെടുക്കുന്നതിന്റെ ഭാഗമായി ജർമ്മനിയിൽ എത്തിയ പ്രധാനമന്ത്രി നരേന്ദ്ര മോദി ഇന്ന് വിവിധ ലോകനേതാക്കളുമായി കൂടിക്കാഴ്ച നടത്തും. കഴിഞ്ഞ ദിവസം ജർമ്മനിയിൽ എത്തിയ അദ്ദേഹത്തെ, ജർമ്മൻ ചാൻസലർ ഒലാഫ് ഷോൾസ് സ്വീകരിച്ചിരുന്നു. ജർമ്മനിയിലെ ഇന്ത്യൻ സമൂഹത്തെ അഭിസംബോധന ചെയ്ത പ്രധാനമന്ത്രിക്ക് വലിയ സ്വീകരണമായിരുന്നു ലഭിച്ചത്.
ഉച്ചകോടിയുടെ ഭാഗമായുള്ള പ്ലീനറി സമ്മേളനത്തിൽ പ്രധാനമന്ത്രി സംസാരിക്കും. കാലാവസ്ഥ, ഊർജ്ജ സംരക്ഷണം, ആരോഗ്യം എന്നീ മേഖലകൾക്ക് കോട്ടം തട്ടാതെ ലോകത്തെ മുന്നോട്ട് കൊണ്ട് പോകേണ്ടുന്നതിന്റെ ആവശ്യകതയെ കുറിച്ച് അദ്ദേഹം സംസാരിക്കും.
തുടർന്ന് ദക്ഷിണാഫ്രിക്കൻ പ്രസിഡന്റ് സിറിൾ റമാഫോസ, ജർമ്മൻ ചാൻസലർ ഒലാഫ് ഷോൾസ്, ഇന്തോനേഷ്യൻ പ്രസിഡന്റ് ജോകോ വിഡോഡോ എന്നിവരുമായും യൂറോപ്യൻ യൂണിയൻ കമ്മീഷൻ പ്രസിഡന്റ് ഉർസുല വാൻഡെർ ലെയെൻ എന്നിവരുമായും ചർച്ചകൾ നടത്തും.
ഉച്ചകോടിയിൽ പങ്കെടുത്ത ശേഷം പ്രധാനമന്ത്രി നാളെ യുഎഇയിലെത്തും. യുഎഇ മുൻ പ്രസിഡന്‍റും അബുദാബി ഭരണാധികാരിയുമായിരുന്ന ഷെയ്ഖ് ഖലീഫ ബിൻ സായിദ് അൽ നഹ്യാന്‍റെ വേർപാടിൽ അനുശോചനം രേഖപ്പെടുത്താനും പുതിയ ഭരണാധികാരി ശൈഖ് മുഹമ്മദ് ബിൻ സായിദ് അൽ നഹ്യാനെ അഭിനന്ദിക്കാനുമാണ് പ്രധാനമന്ത്രി യുഎഇയിൽ എത്തുന്നത്.
Comments