ന്യൂഡൽഹി: പാകിസ്താൻ എംബസിയുടെ വിവിധ ട്വിറ്റർ അക്കൗണ്ടുകൾ റദ്ദാക്കി ട്വിറ്റർ ഇന്ത്യ. യുഎൻ, തുർക്കി, ഇറാൻ, ഈജിപ്ത് എന്നിവിടങ്ങളിലെ പാകിസ്താൻ എംബസികളുടെ ഔദ്യോഗിക അക്കൗണ്ടുകളാണ് ട്വിറ്റർ ഇന്ത്യ നിരോധിച്ചത്. നേരത്തെ നാഷണൽ പബ്ലിക് ബ്രോഡ്കാസ്റ്ററായ റേഡിയോ-പാകിസ്താന്റെ ട്വിറ്റർ അക്കൗണ്ടും ഇന്ത്യയിൽ വിലക്കിയിരുന്നു.
യുഎൻ, തുർക്കി, ഇറാൻ, ഈജിപ്ത് എന്നിവിടങ്ങളിലെ പാകിസ്താൻ എംബസികളുടെ ട്വിറ്റർ അക്കൗണ്ടുകൾ പരിശോധിച്ചാൽ ”വിത്ത്ഹെൽഡ്” (തടഞ്ഞുവെച്ചു) എന്നാണ് ഇനി ഇന്ത്യയിലെ ട്വിറ്റർ ഉപഭോക്താക്കൾക്ക് കാണാനാകുക. അതേസമയം ഔദ്യോഗിക അക്കൗണ്ടുകൾ ഇന്ത്യയിൽ നിരോധിച്ചതോടെ പ്രതികരണവുമായി പാകിസ്താൻ രംഗത്തെത്തി. നിരോധിച്ച അക്കൗണ്ടുകൾ ഉടൻ തന്നെ പുനഃസ്ഥാപിക്കണമെന്നാണ് പാകിസ്താൻ വിദേശകാര്യ മന്ത്രാലയം ട്വിറ്ററിനോട് ആവശ്യപ്പെട്ടത്.
നേരത്തെ ഇന്ത്യയുമായി ബന്ധപ്പെട്ട് വ്യാജവാർത്തകൾ പ്രചരിപ്പിച്ചതിന് പാകിസ്താൻ ആസ്ഥാനമായി പ്രവർത്തിക്കുന്ന ആറ് ചാനലുകൾ ഉൾപ്പെടെ 16 യൂട്യൂബ് ചാനലുകൾ ഇന്ത്യ നിരോധിച്ചിരുന്നു. രാജ്യത്തിന്റെ ദേശീയ സുരക്ഷ, വിദേശബന്ധം എന്നിവയുമായി ബന്ധപ്പെട്ട് തെറ്റായ വിവരങ്ങൾ പ്രചരിപ്പിച്ചിരുന്ന ചാനലുകളായിരുന്നു ഇത്. ജനങ്ങളിൽ പരിഭ്രാന്തി സൃഷ്ടിക്കുന്നതിനും സാമുദായിക സൗഹാർദ്ദം തകർക്കുന്നതിനും ശ്രമിക്കുന്ന ഇത്തരം ചാനലുകളുടെ നിരോധനം തുടരുമെന്ന് വാർത്താവിതരണ പ്രക്ഷേപണ മന്ത്രാലയം അറിയിച്ചിരുന്നു.
Comments