ഒരു മാവിന് കാവൽ നിൽക്കാൻ നാല് സുരക്ഷാ ഭടൻമാരെയും ആറ് കാവൽപട്ടികളെയും ഏർപ്പെടുത്തിയിരിക്കുകയാണ് ദമ്പതികൾ.. ഇതെന്താ സ്വർണ മാമ്പഴം വല്ലതുമാണോ ആ മാവിൽ ഉണ്ടാകുന്നതെന്ന് നമുക്ക് തോന്നാം.. സ്വർണ മാമ്പഴമല്ലെങ്കിലും സ്വർണത്തിന്റെ വിലയുണ്ട് ഈ മാവിലെ മാങ്ങയ്‌ക്ക്..
ലോകത്തിലെ ഏറ്റവും വിലമതിക്കുന്നതും അപൂർവ്വവുമായ മാങ്ങയുണ്ടാകുന്ന മാവായതിനാലാണ് ഉടമസ്ഥർ വൻ സുരക്ഷയൊരുക്കിയത്. മധ്യപ്രദേശിലെ ജബൽപൂരിലുള്ള ദമ്പതികളാണ് തങ്ങളുടെ വീട്ടിലെ അപൂർവ്വ മാവിന് അതിസുരക്ഷ ഏർപ്പെടുത്തിയത്. നാല് സുരക്ഷാജീവനക്കാരും ആറ് നായ്‌ക്കളും ചേർന്ന് സംരക്ഷിക്കുന്ന അപൂർവ്വയിനം മാവ് ഏതാണെന്ന് നോക്കാം..
രണ്ട് മാവുകളാണ് ദമ്പതികളുടെ വീട്ടിലുള്ളത്. ഇവയിലുണ്ടാകുന്ന മാങ്ങകൾ മിയാസക്കി എന്ന പേരിൽ അറിയപ്പെടുന്നു. റൂബിയുടെ നിറമാണ് ഈ മാങ്ങയ്‌ക്കെന്നാണ് പറയപ്പെടുന്നത്. ലോകത്തിലെ ഏറ്റവും വിലപിടിപ്പുള്ള മാങ്ങകളിൽ ഒന്നാണിതെന്നാണ് റിപ്പോർട്ട്. കിലോയ്‌ക്ക് 2.7 ലക്ഷം രൂപ വരെയാണ് മിയാസക്കി മാങ്ങയുടെ വില.
വർഷങ്ങൾക്ക് മുമ്പ് ചെന്നൈയിലേക്കുള്ള ട്രെയിൻ യാത്രക്കിടെ ഒപ്പമുണ്ടായിരുന്ന മറ്റൊരു യാത്രക്കാരനാണ് ജബൽപൂർ ദമ്പതികൾക്ക് മാവിൻ തൈ നൽകിയത്. പൊന്നുപോലെ സൂക്ഷിക്കണമെന്നും മക്കളെ പോലെ നട്ടുവളർത്തണമെന്നും അയാൾ ആവശ്യപ്പെട്ടു. തുടർന്ന് വീട്ടിൽ കൊണ്ടുവന്ന് ആ മാവിൻ തൈകൾ നട്ടു. പക്ഷേ ഇത്രമാത്രം വിലപ്പെട്ട മാവിൻ തൈകളയിരുന്നുവതെന്ന് ദമ്പതികൾ തിരിച്ചറിഞ്ഞില്ല. ദാമിനി എന്ന് പേരിട്ടാണ് അവർ മാവിൻ തൈ നട്ടുവളർത്തിയത്. പിന്നീട് ജപ്പാനിൽ കണ്ടുവരുന്ന, വിലപ്പെട്ടയിനം മിയാസക്കി മാങ്ങയാണിതെന്ന് വർഷങ്ങൾക്കിപ്പുറം ദമ്പതികൾ തിരിച്ചറിഞ്ഞു.
രണ്ട് വർഷം മുമ്പ് പ്രദേശത്തെ ചില കള്ളന്മാർ ചേർന്ന് ദമ്പതികളുടെ വീട്ടുമുറ്റത്തേക്ക് അതിക്രമിച്ച് കയറി മായിസക്കി മാങ്ങ മോഷ്ടിച്ചിരുന്നു. ഇതോടെയാണ് മാവിനെ സംരക്ഷിക്കാൻ അതിസുരക്ഷയൊരുക്കാനുള്ള തീരുമാനം ദമ്പതികൾ സ്വീകരിച്ചത്. മധ്യപ്രദേശിലെ ഹോർട്ടികൾച്ചർ വകുപ്പ് ദമ്പതികളുടെ പക്കലുള്ള മാങ്ങ മിയാസക്കിയാണെന്ന് സ്ഥിരീകരിച്ചിട്ടുണ്ട്. അതിമധുരമുള്ള മാങ്ങയാണിത്. കാഴ്ചയിലും അത്യധികം വ്യത്യസ്ഥത പുലർത്തുന്ന മാങ്ങയുടെ ഉൽപാദനം വളരെ സാവധാനമാണെന്നും ഹോർട്ടികൾച്ചർ വകുപ്പ് ജോയിന്റ് ഡയറക്ടർ ആർ.എസ് കടാര അറിയിച്ചു. എത്രരൂപ തരാമെന്ന് പറഞ്ഞാലും മാങ്ങ വിൽക്കാൻ ഉദ്ദേശ്യമില്ലെന്നാണ് ജബൽപൂരിലെ ദമ്പതികൾ പറയുന്നത്. പുതിയ മാവിൻ തൈകൾ ഉൽപാദിപ്പിക്കാൻ ഈ മാങ്ങകളെല്ലാം തങ്ങൾക്ക് ആവശ്യമാണെന്നും അവർ പറയുന്നു.
