ചെന്നൈ: നടൻ മാധവനെ കണ്ട് ഞെട്ടി നടിപ്പിൻ നായകൻ സൂര്യ. ‘റോക്കെട്രി ദി നമ്പി എഫെക്ട്‘ എന്ന സിനിമയിൽ നമ്പി നാരയണനായിട്ടാണ് നടൻ മാധവൻ അഭിനയിക്കുന്നത്. നമ്പി നാരയണനായി നടൻ മാധവൻ വേഷ പകർച്ച നടത്തിയതോടെ ഇത് കണ്ട് ആശ്ചര്യപ്പെടുകയാണ് നടൻ സൂര്യ. ചിത്രത്തിൽ അതിഥി വേഷത്തിൽ സൂര്യയും പ്രത്യക്ഷപ്പെടുന്നുണ്ട്. ഇതിനായി സിനിമയുടെ ലൊക്കേഷനിൽ എത്തിയതാണ് താരം. നമ്പി നാരായണനും ഇവർക്കൊപ്പം ഉണ്ടായിരുന്നു. ഇരുവരെയും മാറി മാറി നോക്കിയ ശേഷം സൂര്യ അത്ഭുതപ്പെടുന്ന വീഡിയോയാണ് പുറത്ത് വന്നിരിക്കുന്നത്.
“എന്റെ സഹോദരൻ സൂര്യയ്‌ക്ക് മാത്രമാണ് ഇതുപോലെ എന്നെ സന്തോഷവാൻ ആക്കുവാൻ സാധിക്കുന്നത്. എന്റെ സഹോദരന്റെയും അവന്റെ അച്ഛന്റെ ഏറ്റവും വലിയ ആരാധകനാണ് നമ്പി സാർ” എന്ന് കുറിപ്പ് രേഖപ്പെടുത്തിക്കൊണ്ട് നടൻ മാധവൻ തന്നെയാണ് ഈ വീഡിയോ പങ്കുവെച്ചിരിക്കുന്നത്. വീഡിയോ ഇപ്പോൾ സമൂഹമാദ്ധ്യമങ്ങളിൽ വൈറലാവുകയാണ്.
കേരളത്തെ പിടിച്ചുകുലുക്കിയ ഐ.എസ്.ആര്‍.ഒ ചാരക്കേസിനെ അടിസ്ഥാനമാക്കി നമ്പി നാരായണന്‍ രചിച്ച റെഡി ടു ഫയര്‍: ഹൗ ഇന്ത്യ ആന്റ് ഐ സര്‍വൈവ്ഡ് ദ് ഐ.എസ്.ആര്‍.ഒ സ്‌പൈ കേസ് എന്ന പുസ്തകത്തെ ആസ്പദമാക്കിയാണ് സിനിമ. ആനന്ദ് മഹാദേവനാണ് ചിത്രമൊരുക്കുന്നത്. ജൂലൈ 1നാണ് ചിത്രം തിയറ്ററുകളിൽ എത്തുന്നത്. സിനിമയിൽ സൂര്യയ്‌ക്ക് പുറമെ ബോളിവുഡ് സൂപ്പർ താരം ഷാറൂഖ് ഖാനും അതിഥി വേഷത്തിലെത്തുന്നുണ്ട്. മലയാളം, തമിഴ്, ഹിന്ദി, ഇംഗ്ലീഷ്, തെലുങ്ക്, കന്നഡ ഭാഷകളിലാണ് ചിത്രം പുറത്തിറങ്ങുന്നത്.
