മുംബൈ: മഹാരാഷ്ട്ര മുഖ്യമന്ത്രിയായി അധികാരമേറ്റതിന് പിന്നാലെ തന്റെ ട്വിറ്റർ, ഫേസ്ബുക്ക് എന്നിവയുടെ മുഖചിത്രങ്ങൾ മാറ്റി ശിവസേന നേതാവ് ഏകനാഥ് ഷിൻഡെ. സത്യപ്രതിജ്ഞാ ചടങ്ങ് കഴിഞ്ഞ് നിമിഷങ്ങൾക്കകമാണ് ഷിൻഡെ തന്റെ സാമൂഹമാദ്ധ്യമങ്ങളിൽ ചിത്രങ്ങൾ മാറ്റിയത്. അന്തരിച്ച ബാലാസാഹേബ് താക്കറെയുടെ അരികിലിരുന്ന് അനുഗ്രഹം വാങ്ങുന്ന ചിത്രമാണ് ഏകനാഥ് ഷിൻഡെ മുഖചിത്രമായി മാറ്റിയിരിക്കുന്നത്.
ബാലാസാഹെബിന്റെ ഹിന്ദുത്വമാണ് തന്റെ നയമെന്ന് കഴിഞ്ഞ ദിവസം അദ്ദേഹം പ്രഖ്യാപിച്ചിരുന്നു. ഇന്ന് വൈകിട്ട് രാജ്ഭവനിലെ ദർബാർ ഹാളിൽ നടന്ന ചടങ്ങിൽ ഗവർണർ ഭഗത്സിംഗ് കോഷിയാരിയാണ് ഏകനാഥ് ഷിൻഡെയ്ക്ക് സത്യവാചകം ചൊല്ലിക്കൊടുത്തത്. ബിജെപി നേതാവും മുൻ മുഖ്യമന്ത്രിയുമായിരുന്ന ദേവേന്ദ്ര ഫഡ്നാവിസ് ഉപമുഖ്യമന്ത്രിയായും സത്യപ്രതിജ്ഞ ചെയ്തു.
ശിവസേന സ്ഥാപകൻ ബാൽതാക്കറെയെയും ആനന്ദ് ഡിഗെയെയും സ്മരിച്ചുകൊണ്ടായിരുന്നു ഏകനാഥ് ഷിൻഡെ ചരിത്ര ദൗത്യം ഏറ്റെടുത്തത്. ഷിൻഡെയുടെ രാഷ്ട്രീയ ഗുരുവാണ് താനെയിലെ ശിവസേനാ നേതാവായിരുന്ന ആനന്ദ് ഡിഗെ. ഭാരത് മാതാ കി ജയ് വിളികളും ശിവസേന മുദ്രാവാക്യവും മുഴങ്ങിയ ആവേശഭരിതമായ ചടങ്ങിലായിരുന്നു സത്യപ്രതിജ്ഞ നടന്നത്. മന്ത്രിസഭയുടെ പൂർണചിത്രം വരും ദിവസങ്ങളിലാകും വ്യക്തമാകുക.
Comments