ജാവലിൻ ത്രോ താരവും ഒളിമ്പിക്‌സ് സ്വർണമെഡൽ ജേതാവുമായ നീരജ് ചോപ്ര കഴിഞ്ഞയിടയ്‌ക്കാണ് സ്വന്തം റെക്കോർഡ് തിരുത്തി രാജ്യത്തിന് വീണ്ടും അഭിമാനമായത്. സ്വീഡനിലെ സ്‌റ്റോക്ക്‌ഹോമിൽ നടന്ന ഡയമണ്ട് ലീഗിൽ മത്സരിക്കുന്നതിനിടെയായിരുന്നു നേരത്തെ രേഖപ്പെടുത്തിയ ദേശീയ റെക്കോർഡ് താരം തിരുത്തിയത്. 89.94 മീറ്ററിലേയ്‌ക്ക് ജാവലിൻ പായിച്ച നീരജ് ചോപ്ര മുൻ റെക്കോർഡ് തിരുത്തി വെള്ളിമെഡൽ നേടുകയും ചെയ്തു. ടോക്കിയോ ഒളിമ്പിക്‌സ് നേട്ടത്തിന് ശേഷം ഫിൻലാൻഡിൽ നടന്ന കുർതാനെ ഗെയിംസിലും നീരജ് സ്വർണ മെഡൽ കരസ്ഥമാക്കിയിരുന്നു.
മെഡൽ വേട്ട നടത്തി രാജ്യത്തിന്റെ യശസുയർത്തിയ നീരജ് ചോപ്ര ഇപ്പോഴിതാ വീണ്ടും ഇന്ത്യക്കാരുടെ ഹൃദയം കീഴടക്കിയിരിക്കുകയാണ്. സ്റ്റോക്ക് ഹോമിൽ പ്രകടനം കാഴ്ചവെച്ച നീരജ് ചോപ്രയെ അഭിനന്ദിക്കാൻ ഒരു മുതിർന്നയാൾ എത്തുന്നതും അദ്ദേഹത്തിന്റെ കാൽതൊട്ടുവന്ദിക്കുന്ന നീരജ് ചോപ്രയുമാണ് ഇപ്പോൾ സോഷ്യൽ മീഡിയ കീഴടക്കുന്നത്.
So down to earth this person @Neeraj_chopra1 ❣️Took blessing from an elderly fan. That speaks volumes. Love you ❤️ pic.twitter.com/jjo9OxHABt
— ಮೀಮರ್ ಮುತ್ತಣ್ಣ (@ijnani) June 30, 2022
സ്റ്റോക്ക് ഹോമിൽ തന്നെ കാണാനെത്തിയ ആരാധകരോടൊപ്പം നിന്ന് ഫോട്ടോയെടുക്കുന്നതും അവരുമായി ഇടപഴകുന്നതുമാണ് വീഡിയോയുടെ തുടക്കം. ഇതിനിടെയാണ് പ്രായമായ ഒരാൾ എത്തി നീരജിനെ അഭിനന്ദിക്കുന്നത്. ഏറെ തിരക്കിലായിരുന്നിട്ട് കൂടി അദ്ദേഹത്തിന്റെ അഭിനന്ദനം ഏറ്റുവാങ്ങുകയും അജ്ഞാതനായ വ്യക്തിയുടെ കാൽതൊട്ട് വന്ദിക്കുകയും നീരജ് ചെയ്യുന്നു. അൽപം നീങ്ങി താരത്തിന് പോകാനുള്ള വാഹനം കാത്തുനിൽക്കുന്നുണ്ടായിരുന്നതിനാൽ ആരാധകരോട് വളരെ പെട്ടെന്ന് യാത്ര പറഞ്ഞ് നീരജ് മടങ്ങുന്നതും ദൃശ്യങ്ങളിൽ കാണാം.
ട്വിറ്ററിലൂടെ പുറത്തുവന്ന ദൃശ്യങ്ങൾ നിമിഷ നേരം കൊണ്ടാണ് വൈറലായത്. മത്സരിക്കുമ്പോൾ മാത്രമല്ല, ട്രാക്കിന് പുറത്തും നീരജ് അഭിമാനമാകുന്നുവെന്നാണ് ആരാധകരുടെ പ്രതികരണം. ജൂൺ 30-നായിരുന്നു സ്റ്റോക്ക്‌ഹോം ഗെയിംസിൽ നീരജ് വെള്ളിമെഡൽ നേടിയത്. ഒരു മാസത്തിനിടെ അന്താരാഷ്‌ട്ര വേദികളിൽ മൂന്നാം മെഡലാണ് നീരജ് സ്വന്തമാക്കിയത്.
