ന്യൂഡൽഹി : ബാഗേജിൽ ഒളിപ്പിച്ച് വിദേശത്തേക്ക് ഡോളർ കടത്താൻ ശ്രമിച്ചയാളെ കൈയ്യോടെ പിടികൂടി കസ്റ്റംസ്. കൊൽക്കത്തയിൽ നിന്ന് ഡൽഹി വിമാനത്താവളം വഴി ബാങ്കോക്കിലേക്ക് അനധികൃതമായി ഡോളർ കടത്താൻ ശ്രമിച്ചയാളാണ് പിടിയിലായത്. ബാഗിൽ ഒളിപ്പിച്ച 40,000 യുഎസ് ഡോളർ, അതായത് 30,90,000 രൂപ, പിടിച്ചെടുത്തു.
ഡോളർ കടത്ത് നടത്തുന്നുവെന്ന രഹസ്യവിവരം ലഭിച്ചതിന്റെ അടിസ്ഥാനത്തിലായിരുന്നു പരിശോധന. ചെക്ക് ഇൻ നടപടികൾ പൂർത്തിയാക്കിയ യാത്രക്കാരനെ കൊൽക്കത്ത കസ്റ്റംസ് ഉദ്യോഗസ്ഥർ തടഞ്ഞുനിർത്തി പരിശോധിക്കുകയായിരുന്നു. പപ്പടത്തിനും തേയിലയ്ക്കുമിടയിൽ ഡോളർ ഒളിപ്പിച്ച നിലയിലാണ് കണ്ടെത്തിയത്. ബാഗിൽ രഹസ്യ അറയുണ്ടാക്കി അതിൽ ഡോളർ ഒളിപ്പിച്ച് കടത്താനായിരുന്നു ശ്രമം.
