കൊച്ചി : ടൈപിസ്റ്റ് വിസയുടെ പേരിൽ കംബോഡിയയിലെ അന്താരാഷ്ട്ര സെക്സ്ചാറ്റ് റാക്കറ്റിൽ കുടുക്കിയെന്ന പരാതിയുമായി മലയാളി യുവാക്കൾ രംഗത്ത്. പത്തനംതിട്ട, കോട്ടയം സ്വദേശികളായ ഏജന്റുമാരാണ് മലയാളി യുവാക്കളെ റാക്കറ്റിൽ കുടുക്കിയത്. വിസ ടൈപിസ്റ്റ് ജോലി വാഗ്ദാനം ചെയ്ത് ലക്ഷണങ്ങൾ വാങ്ങിയാണ് ഇവരെ കംബോഡിയയിലേക്ക് അയയ്ക്കുന്നത്. എന്നാൽ അവിടെ വിദേശികളുമായി പെൺകുട്ടികളുടെ പേരിൽ സെക്സ് ചാറ്റ് ചെയ്യുകയാണ് ജോലിയെന്ന് രക്ഷപ്പെട്ട് വന്നവർ പറയുന്നു.
കംബോഡിയയിലെ ചൈനീസ് കമ്പനിയുടെ നേതൃത്വത്തിലുള്ള ചൂതാട്ട കേന്ദ്രത്തിന്റെ മറവിലാണ് സെക്സ്ചാറ്റ് റാക്കറ്റ് പ്രവർത്തിക്കുന്നത്. ഇവിടെയെത്തുന്ന യുവാക്കൾക്ക് പെൺകുട്ടികളുടെ പേരിലുള്ള വ്യാജ പ്രൊഫൈൽ ഐഡി നൽകുകയും വിദേശികളടക്കമുള്ളവരോട് സെക്സ്ചാറ്റ് ചെയ്യാൻ നിർബന്ധിക്കുകയും ചെയ്തു. ചാറ്റ് ചെയ്ത് അവരെ വീഴ്ത്തുകയെന്നതാണ് തങ്ങൾക്ക് കിട്ടിയ ജോലിയെന്ന് രക്ഷപ്പെട്ട് നാട്ടിലെത്തിയ അൻഷുൽ എന്ന യുവാവ് പറഞ്ഞു. ചാറ്റ് ചെയ്ത് ഒരാൾ ഏറ്റവും കുറഞ്ഞത് 30 ഡോളറെങ്കിലും കമ്പനിക്ക് നേടിക്കൊടുക്കണം എന്ന ടാർഗറ്റ് വെച്ചതായും അൻഷുൽ പറയുന്നു.
വിസ ടൈപ്പിസ്റ്റ് ജോലിയാണ് വാഗ്ദാനം ചെയ്തിരിക്കുന്നതെന്നും സെക്സ് ചാറ്റ് ജോലി ചെയ്യാനാവില്ലെന്നും പറയുന്ന യുവാക്കളെ മുറിയിൽ പൂട്ടിയിടുകയും ഭക്ഷണവും വെള്ളവും നിഷേധിക്കുകയും ചെയ്തുവെന്ന് അൻഷുൽ പറയുന്നു. കംബോഡിയ പോലീസിന് പരാതി നൽകിയെങ്കിലും നടപടിയുണ്ടായില്ലെന്നും പിന്നീട് രക്ഷപ്പെട്ട് പോരുകയായിരുന്നുവെന്നും അൻഷുൽ പറഞ്ഞു. അൻഷുലിന്റെ പരാതിയിൽ ബിനാനിപുരം പോലീസ് കേസെടുത്തു.
