ആരാധകരെ ആവേശത്തിലാക്കി ചിരഞ്ജീവി ചിത്രം ‘ ഗോഡ്ഫാദർ ‘ ന്റെ ഫസ്റ്റ് ലുക്ക് പോസ്റ്റർ പുറത്ത് . ടോളിവുഡ് പ്രേക്ഷകർ ഏറെ പ്രതീക്ഷയോടെ കാത്തിരുന്ന ചിത്രത്തിന്റെ ഫസ്റ്റ് ലുക്കിന് മികച്ച സ്വീകാര്യതയാണ് ലഭിച്ച് കൊണ്ടിരിക്കുന്നത്. പുറത്ത് വന്ന് നിമിഷ നേരം കൊണ്ട് തന്നെ പോസ്റ്റർ ആരാധകർ ഏറ്റെടുത്തു. മാസായി കാറിൽ നിന്നും ഇറങ്ങുന്ന ചിരഞ്ജീവി കഥാപാത്രത്തെ വീഡിയോയിൽ കാണാം.
മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്ത ലൂസിഫറിന്റെ തെലുങ്ക് റീമേക്ക് ആണ് ഈ ചിത്രം. അതിനാൽ തന്നെ മലയാളികളും ചിത്രത്തിന്റെ റിലീസിനായി കാത്തിരിക്കുകയാണ് .
മോഹൻ രാജ സംവിധാനം ചെയ്യുന്ന ഈ ചിത്രം ചിരഞ്ജീവിയുടെ കരിയറിലെ 153-ാം ചിത്രമാണ് . കോനിഡേല പ്രൊഡക്ഷൻ കമ്പനിയും സൂപ്പർ ഗുഡ് ഫിലിംസും ചേർന്നാണ് ചിത്രം നിർമ്മിക്കുന്നത്. നായികയായി എത്തുന്നത് നയൻതാരയാണ് . സത്യദേവ് കഞ്ചാറാണയും ചിത്രത്തിൽ പ്രധാന കഥാപാത്രത്തെ അവതരിപ്പിച്ചിട്ടുണ്ട്. നീരവ് ഷായാണ് ചിത്രത്തിന്റെ ഛായാഗ്രാഹകൻ.
എസ് തമൻ സംഗീത സംവിധാനവും പ്രഭുദേവ നൃത്തസംവിധാനവും നിർവ്വഹിച്ചിരിക്കുന്നു. നിരവധി ബോളിവുഡ് ചിത്രങ്ങളുടെ കലാസംവിധാനം നിർവ്വഹിച്ച സുരേഷ് സെൽവരാജനാണ് കലാസംവിധായകൻ. ബോളിവുഡ് താരം സൽമാൻ ഖാനും ചിത്രത്തിൽ പ്രധാനകഥാപാത്രത്തെ അവതരിപ്പിക്കുന്നുണ്ട്.
ലൂസിഫറിന്റെ തെലുങ്ക് റീമേക്ക് റിലീസിന് ഒരുങ്ങുമ്പോൾ അതിന്റെ രണ്ടാം ഭാഗമായ മലയാള ചിത്രത്തിനായുള്ള കാത്തിരിപ്പിലാണ് ആരാധകർ.രണ്ടാം ഭാഗമായ മലയാള ചിത്രം എമ്പുരാന്റെ ചിത്രീകരണം ഈ വർഷം ഉണ്ടാകുമെന്നാണ് നേരത്തെ തിരക്കഥാകൃത്തും നടനുമായ മുരളി ഗോപി പറഞ്ഞിരുന്നത്. ചിത്രത്തിന്റെ ഷൂട്ട് എപ്പോൾ മുതൽ ആരംഭിക്കുന്നതിൽ ഇതുവരെയും വ്യക്തത വന്നിട്ടില്ല. അതേസമയം വലിയ കാൻവാസ് ആവശ്യംവേണ്ട ചിത്രമാണ് എമ്പുരാനെന്നും ആദ്യഭാഗം വിജയിച്ചതുകൊണ്ടാണ് രണ്ടാംഭാഗം ആലോചിച്ചതെന്നും പ്രഖ്യാപനവേളയിൽ പൃഥ്വിരാജ് പറഞ്ഞിരുന്നു.
Comments