തിരുവനന്തപുരം : ഭരണഘടനയ്‌ക്കെതിരായ മന്ത്രി സജി ചെറിയാന്റെ വിവാദ പരാമർശത്തിൽ നടപടി ആവശ്യപ്പെട്ട് ഗവർണ്ണർക്ക് പരാതി നൽകി ബിജെപി നേതാവ് സന്ദീപ് വാചസ്പതി. ഭരണഘടനാ വിരുദ്ധ പരാമർശം നടത്തി സത്യപ്രതിജ്ഞാ ലംഘനം നടത്തുകയാണ് സജി ചെറിയാൻ ചെയ്തിരിക്കുന്നത്. ഇതിനെതിരെ ഗവർണർക്ക് പരാതി നൽകിയെന്നും നടപടി ഉണ്ടാകുമെന്ന് വിശ്വസിക്കുന്നുവെന്നും സന്ദീപ് വാചസ്പതി പറഞ്ഞു.
മന്ത്രി സ്ഥാനത്ത് നിന്നും എം.എൽ.എ സ്ഥാനത്ത് നിന്നും സജി ചെറിയാനെ പുറത്താക്കാൻ ഗവർണ്ണർ മുഖ്യമന്ത്രിയോട് ആവശ്യപ്പെടണം. അതല്ലായെങ്കിൽ ഭരണഘടനാപരമായ അധികാരം ഉപയോഗിച്ച് രണ്ട് സ്ഥാനങ്ങളിൽ നിന്നും സജിചെറിയാനെ പുറത്താക്കാൻ ഗവർണർ ഇടപെടണമെന്നും സന്ദീപ് വാചസ്പതി ഗവർണർ ആരിഫ് മുഹമ്മദ് ഖാനോട് ആവശ്യപ്പെട്ടു.
കമ്യൂണിസ്റ്റുകളുടെ ഏകാധിപത്യത്തിന് എന്നും തടസ്സം ഭാരതത്തിന്റെ ഭരണഘടനയാണെന്നും അവരെ സംബന്ധിച്ചിടത്തോളം ഭരണഘടന എന്നത് വെറുക്കപ്പെടേണ്ടതാണെന്നും വാചസ്പതി സംഭവത്തിൽ വിമർശിച്ചിരുന്നു. നൂറ് തലമുറ കഴിഞ്ഞാലും അവരുടെ ആഗ്രഹം നടപ്പാകില്ലെന്നും ഡോ. ബി.ആർ അംബേദ്കർ അടക്കമുള്ള മഹാൻമാർ സജിചെറിയാനെ പോലുള്ള ഏകാധിപതികളെ കൂടി മുന്നിൽ കണ്ടാണ് ഭാരതത്തിന്റെ ഭരണഘടന നിർമ്മിച്ചിരിക്കുന്നതെന്നും അദ്ദേഹം വ്യക്തമാക്കിയിരുന്നു.
