നെയ്യാറ്റിൻകര: സ്വാതന്ത്ര്യസമര സേനാനിയും പ്രമുഖ ഗാന്ധിയനുമായ പി. ഗോപിനാഥൻ നായർ അന്തരിച്ചു. 100 വയസായിരുന്നു. ഒരു മാസം മുമ്പ് വീട്ടിൽ വെച്ചുണ്ടായ വീഴ്ചയിൽ തലയ്ക്ക് പരിക്കേറ്റതിനെ തുടർന്ന് ചികിത്സയിൽ തുടരവെയാണ് അന്ത്യം. നെയ്യാറ്റിൻകര നിംസ് ആശുപത്രിയിലായിരന്നു ചികിത്സ. കഴിഞ്ഞ ഒരാഴ്ചയായി വെന്റിലേറ്ററിലായിരുന്നു.
1922 ജൂലൈ ഏഴിന് നെയ്യാറ്റിൻകരയിലായിരുന്നു ഗോപിനാഥൻ നായർ ജനിച്ചത്. വിദ്യാഭ്യാസ കാലത്ത് തന്നെ ഗാന്ധിയൻ ആശയങ്ങളിൽ ഗോപിനാഥൻ നായർ ആകൃഷ്ടനായിരുന്നു. ഗാന്ധിയൻ മാർഗങ്ങളിൽ ചെറുപ്പം മുതൽ ഉറച്ചുനിന്നിരുന്ന അദ്ദേഹം ഗാന്ധിജി ഒരിക്കൽ കേരളത്തിലെത്തിയപ്പോൾ നേരിട്ട് കാണാൻ കഴിഞ്ഞതോടെ ആവശേത്തിലാകുകയും ചെയ്തു. കോളേജ് വിദ്യാഭ്യാസ കാലത്ത് തന്നെ സ്വാതന്ത്ര്യസമരത്തിൽ പങ്കെടുക്കുകയും ചെയ്തു.
ക്വിറ്റ് ഇന്ത്യാ സമരത്തിൽ പങ്കെടുത്തതിന് പിന്നാലെ ജയിൽവാസം അനുഭവിക്കുകയും ചെയ്തിട്ടുണ്ട്. തുടർന്ന് രാജ്യത്തുടനീളം ഗാന്ധിയൻ സന്ദേശവുമായി സഞ്ചരിച്ചു. സേവനകാലയളവിൽ ഗാന്ധിജിയുടെ സേവാഗ്രാം ആശ്രമത്തിൽ പ്രസിഡന്റായി പ്രവർത്തിച്ചിട്ടുണ്ട്. ഗാന്ധി സ്മാരകനിധിയുടെ അദ്ധ്യക്ഷനായും ദീർഘകാലം പ്രവർത്തിച്ചു. 2016ൽ പത്മശ്രീ നൽകി അദ്ദേഹത്തെ രാജ്യം ആദരിച്ചിട്ടുണ്ട്.
