ലക്നൗ: നാല് കൈകളും കാലുകളുമുള്ള പെൺകുഞ്ഞ് ജനിച്ചു. ഉത്തർപ്രദേശിലെ ഷഹാബാദ് മേഖലയിലുള്ള ഒരു ഗ്രാമത്തിലാണ് സംഭവം. അപൂർവ്വമായ കുഞ്ഞിനെ കാണാൻ ഷഹാബാദ് കമ്മ്യൂണിറ്റി ഹെൽത്ത് സെന്ററിലേക്ക് ജനങ്ങൾ ഒഴുകിയെത്തുകയാണെന്നാണ് റിപ്പോർട്ട്.
പ്രകൃതിയുടെ അത്ഭുതമെന്നാണ് സമീപവാസികൾ കുഞ്ഞിനെ വിശേഷിപ്പിച്ചത്. അമ്മയുടെയും നവജാത ശിശുവിന്റെയും ആരോഗ്യനില നിലവിൽ തൃപ്തികരമാണെന്ന് ഡോക്ടർമാർ അറിയിച്ചു. എന്നാൽ കൂടുതൽ പരിശോധനകൾക്കായി ലക്നൗവിലെ ആശുപത്രിയിലേക്ക് റെഫർ ചെയ്തതായി ആരോഗ്യകേന്ദ്രത്തിലെ അധികൃതർ വ്യക്തമാക്കി.
ഇരട്ടകുഞ്ഞുങ്ങളിൽ ഒരാളുടെ വളർച്ച പൂർണമാകാതെയിരിക്കുമ്പോഴാണ് ഇത് സംഭവിക്കുന്നതെന്നാണ് ഡോക്ടർമാരുടെ വിലയിരുത്തൽ. രണ്ടാമത്തെ കുഞ്ഞിന്റെ കൈകളും കാലുകളും ചെറിയ രീതിയിൽ മാത്രം രൂപപ്പെട്ടതോടെ ഒരേ കുഞ്ഞ് തന്നെ നാല് കൈകളും കാലുകളും ഉള്ള രീതിയിൽ ജനിക്കാൻ കാരണമായെന്നാണ് ഡോക്ടർമാർ പറയുന്നത്.
Comments