കൊല്ക്കത്ത: കാളിദേവിയ്ക്കെതിരെ നടത്തിയ വിവാദപരാമര്ശത്തില് തൃണമൂല് കോണ്ഗ്രസ് തള്ളിപ്പറഞ്ഞതോടെ ട്വിറ്ററില് തൃണമൂല് കോണ്ഗ്രസിനെ അണ്ഫോളോ ചെയ്ത് മഹുവ മൊയ്ത്ര. പാര്ട്ടിയുടെ ഔദ്യോഗിക ട്വിറ്റര് അക്കൗണ്ടാണ് മഹുവ മൊയ്ത്ര അണ്ഫോളോ ചെയ്തിരിക്കുന്നത്. നിലവില് മുഖ്യമന്ത്രി മമത ബാനര്ജിയെ മാത്രമാണ് പാര്ട്ടിയുമായി ബന്ധപ്പെട്ട് ഇവര് ട്വിറ്ററില് പിന്തുടരുന്നത്. കാളിദേവിക്കെതിരെ വിവാദ പരാമര്ശം നടത്തിയതിന് പിന്നാലെ, ഇത് തള്ളിക്കൊണ്ട് തൃണമൂല് കോണ്ഗ്രസ് രംഗത്തെത്തിയിരുന്നു.
തന്നെ സംബന്ധിച്ച് കാളി ഇറച്ചി കഴിക്കുന്ന മദ്യം കഴിക്കുന്ന ദേവതയാണെന്നായിരുന്നു മഹുവയുടെ പരാമര്ശം. ഇത് വലിയ തോതില് വിവാദമായതോടെയാണ് പാര്ട്ടിയും ഇതിനെ തള്ളി രംഗത്തെത്തിയത്. മഹുവ മൊയ്ത്ര പറഞ്ഞത് തീര്ത്തും അവരുടെ അഭിപ്രായം മാത്രമാണെന്നും പാര്ട്ടിക്ക് ഇതുമായി യാതൊരു ബന്ധവും ഇല്ലെന്നുമായിരുന്നു വിശദീകരണം. മഹുവ മൊയ്ത്രയുടെ അഭിപ്രായത്തെ ശക്തമായി അപലപിക്കുന്നുവെന്നും പാര്ട്ടി വ്യക്തമാക്കി. ഔദ്യോഗിക ട്വിറ്റര് പേജിലൂടെയായിരുന്നു വിശദീകരണം നല്കിയത്. ഇതിന് പിന്നാലെയാണ് ഈ പേജ് മഹുവ മൊയ്ത്ര അണ്ഫോളോ ചെയ്തത്.
കാളിദേവിയുടെ വേഷം ധരിച്ച സ്ത്രീ പുകവലിക്കുന്നതുമായി ബന്ധപ്പെട്ടുള്ള പോസ്റ്റര് വിവാദമായതിനോടായിരുന്നു മഹുവ മൊയ്ത്രയുടെ പ്രതികരണം. ഇതിന് പിന്നാലെ ഇവര്ക്കെതിരെ വലിയ തോതില് വിമര്ശനങ്ങള് ഉയരുകയായിരുന്നു. ഇവരുടെ അറസ്റ്റ് ആവശ്യപ്പെട്ട് ‘അറസ്റ്റ്ലീനമണിമേഖല’ എന്ന ഹാഷ് ടാഗും ട്വിറ്ററില് ട്രെന്ഡിംഗ് ആണ്. എന്നാല് പ്രതിഷേധങ്ങളെ ഭയക്കുന്നില്ലെന്ന് ലീന മണിമേഖല ട്വീറ്റ് ചെയ്തു.
