ഒരു കുഞ്ഞുണ്ടാകാൻ ഒരുകോടിയിലധികം രൂപ ചിലവഴിച്ച ദമ്പതികൾ സോഷ്യൽ മീഡിയയിൽ ചർച്ചയായിരുന്നു..
കുട്ടികളുണ്ടാകാൻ വേണ്ടി ചികിത്സകൾ നടത്തുന്നതും അതിനായി ലക്ഷക്കണക്കിന് രൂപ ചിലവാക്കുന്നതും പതിവ് സംഭവമായിട്ടു കൂടി ഈ ദമ്പതികളുടെ വിഷയം ഇത്രയേറെ ചർച്ചയാകാനെന്താണ് കാര്യം എന്നല്ലേ….
അവർ തമ്മിലുള്ള പ്രായവ്യത്യാസം തന്നെയാണ് കാരണം..
വ്യത്യസ്തരായ ഈ ദമ്പതികളെക്കുറിച്ച് അറിയാം..
ഇരുവർക്കുമിടയിൽ 37 വർഷത്തിന്റെ പ്രായവ്യത്യാസമാണുള്ളത്. ഖുറാൻ മെക്കെയ്ൻ എന്ന 24-കാരനും ചെറിൽ മെക്ഗ്രഗർ എന്ന 61കാരിയുമാണ് വ്യത്യസ്തരായ ഈ ദമ്പതികൾ. 2021ൽ വിവാഹിതരായ 24-കാരനും 61-കാരിയും ഏറെ നാളായി സ്വപ്നം കണ്ട, ഒരു കുഞ്ഞെന്ന മോഹമാണ് ഇപ്പോൾ പൂവണിയാൻ പോകുന്നത്.
2023 ആകുമ്പോഴേക്കും വാടക ഗർഭധാരണം വഴി ഇവർക്ക് കുഞ്ഞിനെ ലഭിക്കും. ഇതിനായി 1,20,000 പൗണ്ടാണ് ഇവർ ചിലവഴിച്ചിരിക്കുന്നത്. അതായത് 1.14 കോടി ഇന്ത്യൻ രൂപ. വാടക ഗർഭധാരണത്തിലൂടെ കുഞ്ഞിനെ ലഭിക്കാൻ പൊതുവെ 6000 മുതൽ 1,20,000 പൗണ്ട് വരെ തുക ആവശ്യമായി വരുമെന്ന് അച്ഛനാകാൻ തയ്യാറെടുക്കുന്ന ഖുറാൻ പറയുന്നു.
ഖുറാന്റെ ആദ്യ കുഞ്ഞാണ് ഇത്തരത്തിൽ ജനിക്കാൻ പോകുന്നത്. എന്നാൽ 61-കാരിയായ ഭാര്യയ്ക്ക് ഇതിന് മുമ്പ് ഏഴ് മക്കളും 17 കൊച്ചുമക്കളും ജനിച്ചിട്ടുണ്ട്. താൻ വളരെയധികം സന്തോഷത്തിലാണെന്ന് ഖുറാൻ പറയുന്നു.
എന്നും ആഗ്രഹിച്ചിരുന്ന ഒരു കാര്യമാണിത്. ലോകത്തിൽ വെച്ച് ഏറ്റവുമധികം ഇഷ്ടപ്പെടുന്ന ആളോടൊപ്പം ഒരു കുടുംബമുണ്ടാകുക.. അതിപ്പോൾ സാധിക്കാൻ പോകുകയാണെന്ന് ഖുറാൻ മാദ്ധ്യമങ്ങളോട് പ്രതികരിച്ചു..
2012ലാണ് ഖുറാൻ ആദ്യമായി ചെറിലിനെ കാണുന്നത്. അന്ന് 15 വയസ് മാത്രമാണ് ഖുറാന്റെ പ്രായം. ചെറിലിന്റെ മകൻ ക്രിസിന്റെ ഉടമസ്ഥതയിലുള്ള റെസ്റ്റോറെന്റിൽ ജോലിക്കെത്തിയതായിരുന്നു ഖുറാൻ. എന്നാൽ എട്ട് വർഷം പിന്നിട്ടപ്പോൾ ഒരു കടയിൽ വെച്ച് വീണ്ടും ചെറിലിനെ ഖുറാൻ കാണാനിടയായി. അതിന് ശേഷമാണ് ഇരുവരും തമ്മിൽ പ്രണയത്തിലാകുന്നത്.
ഇരുവരുടെയും ജീവിതത്തെക്കുറിച്ച് അനുകൂലവും പ്രതികൂലവുമായ പ്രതികരണങ്ങളാണ് സമൂഹത്തിൽ നിന്നും ലഭിച്ചുകൊണ്ടിരിക്കുന്നത്. സൈബർ ലോകത്ത് പോലും അവർ ഒരുസമയത്ത് നിരന്തരം വേട്ടയാടപ്പെട്ടു. വിമർശനങ്ങളിൽ ഭർത്താവായ ഖുറാനെ ഏറ്റവുമധികം വിഷമിപ്പിക്കുന്ന കാര്യം പണത്തിന് വേണ്ടിയാണ് 61-കാരിയായ ചെറിലിനെ വിവാഹം കഴിച്ചതെന്ന ജനങ്ങളുടെ ആക്ഷേപമാണ്.
സമൂഹം ഇത്ര പുരോഗമിച്ചുവെങ്കിലും പ്രായവ്യത്യാസം മൂലം ഇപ്പോഴും ഏറെ വിമർശനം നേരിടുന്നവരാണ് ഖുറാനും ചെറിലും. ഇരുവരെയും ഒന്നിച്ച് കാണുമ്പോൾ ചെറിലിന്റെ കൊച്ചുമകനാണോ ഖുറാൻ എന്ന ചോദ്യമാണ് ഉയരാറുള്ളതെന്ന് ദമ്പതികൾ വെളിപ്പെടുത്തിയിട്ടുണ്ട്. എന്തായാലും വിമർശനങ്ങളെയെല്ലാം അതിജീവിച്ച് ഒരു കുഞ്ഞിനെ സ്വന്തമാക്കുകയെന്ന ലക്ഷ്യത്തിലേക്ക് അടുക്കുകയാണ് ദമ്പതികൾ..
