ഒരു വലിയ ദ്വാരവുമായി എമിറേറ്റ്‌സ് വിമാനം 14 മണിക്കൂർ പറന്നുവെന്ന ഞെട്ടിപ്പിക്കുന്ന വിവരമാണ് ഇപ്പോൾ പുറത്തുവരുന്നത്. ദുബായിൽ നിന്ന് ഓസ്‌ട്രേലിയയിലേക്ക് പോയ എയർബസ് എ380 എന്ന എമിറേറ്റ്‌സ് വിമാനത്തിലാണ് വലിയ ദ്വാരം കണ്ടെത്തിയത്. വിമാനത്തിന്റെ ഒരു വശത്തായി പ്രത്യക്ഷപ്പെട്ട ഈ തുള അപകടകാരിയായിരുന്നില്ലെന്നാണ് റിപ്പോർട്ട്.
ദുബായിൽ നിന്നും ഓസ്‌ട്രേലിയയിലെ ബ്രിസ്‌ബെയ്ൻ എയർപോർട്ടിലേക്കായിരുന്നു വിമാനം സഞ്ചരിച്ചത്. 14 മണിക്കൂർ യാത്രക്കൊടുവിൽ വിമാനം ബ്രിസ്‌ബെയ്ൻ എയർപോർട്ടിലെത്തി. യാത്രക്കാർ സുരക്ഷിതരായി പുറത്തിറങ്ങിയതിന് ശേഷമായിരുന്നു വിമാനത്തിന് പുറത്ത് വലിയ തുള സൃഷ്ടിക്കപ്പെട്ട കാര്യം അധികൃതരുടെ ശ്രദ്ധയിൽപ്പെട്ടത്.
Emirates Airbus A380 (A6-EVK) departed rwy 30L at Dubai (OMDB), VAE on flight #EK430 to Brisbane, Qld, Australia where it landed safely. After landing, a large hole was seen in the left fuselage, allegedly coming from a detached bolt in the nosegear.https://t.co/o1EqBuJ0bA pic.twitter.com/s4p6tIpXDw
— JACDEC (@JacdecNew) July 2, 2022
തുടർന്ന് എമിറേറ്റ്‌സ് അധികൃതർ പ്രസ്താവന പുറത്തിറക്കി. വിമാനത്തിന് സാങ്കേതികമായ തകരാർ അനുഭവപ്പെട്ടുവെന്നും ടയറുകളിൽ ഒന്നിന് പൊട്ടൽ സംഭവിക്കുകയും തുടർന്ന് ഇത് വിമാനത്തിന്റെ പുറം പാളിയിൽ ചില കേടുപാടുകൾ വരുത്തിയെന്നുമായിരുന്നു പ്രസ്താവന.
വിള്ളൽ വിമാനയാത്രയെ ബാധിച്ചിട്ടില്ലെന്നും അപകടകാരിയായിരുന്നില്ലെന്നും അവർ അറിയിച്ചു. പൊട്ടലുണ്ടായത് പുറംചട്ടയിലാണ്. അതുകൊണ്ടുതന്നെ വിമാനത്തിന്റെ ഘടനയെയോ പ്രവർത്തനത്തെയോ വിള്ളൽ ബാധിച്ചിരുന്നില്ല. യാത്രക്കാരുടെ സുരക്ഷയാണ് തങ്ങൾക്ക് ഏറ്റവും പ്രധാനപ്പെട്ടതെന്നും എമിറേറ്റ്‌സ് പ്രസ്താവനയിലൂടെ വ്യക്തമാക്കി.
