ബറെയ്‌ലി: ബിജെപിയുടെ മുൻ വക്താവ് നൂപുർ ശർമ്മയെ തലവെട്ടുമെന്ന് ഭീഷണിപ്പെടുത്തിയയാളെ പോലീസ് അറസ്റ്റ് ചെയ്തു. നൂപുർ ശർമ്മയുടെ തലവെട്ടുമെന്ന് ഭീഷണിപ്പെടുത്തുന്ന വീഡിയോ ഇയാൾ സമൂഹമാദ്ധ്യമങ്ങളിലൂടെ പങ്കുവെച്ചിരുന്നു. ഇതിന്റെ പശ്ചാത്തലത്തിൽ ”ഭീഷണി മുഴക്കുകയും വർഗീയ സംഘർഷം ഉണ്ടാക്കാൻ ശ്രമിക്കുകയും ചെയ്തുവെന്ന” കുറ്റത്തിന് ബറെയ്‌ലി പോലീസ് ഇയാളെ അറസ്റ്റ് ചെയ്യുകയായിരുന്നു.
വീഡിയോ പങ്കുവെച്ച് മണിക്കൂറുകൾക്കുള്ളിൽ പോലീസ് ഇയാളെ പിടികൂടി. നാസിർ ഹുസൈൻ എന്നയാളാണ് അറസ്റ്റിലായതെന്ന് പോലീസ് അറിയിച്ചു. ഫരീദ്പൂർ പോലീസ് സ്‌റ്റേഷൻ പരിധിയിൽ ഉൾപ്പെടുന്ന കസ്സവാൻ ഏരിയയിലെ വീട്ടിൽ നിന്നാണ് നാസിർ ഹുസൈനിനെ പോലീസ് പിടികൂടിയത്.
വർഗീയ കലാപം സൃഷ്ടിക്കാൻ ശ്രമിക്കുന്നവർക്കെതിരെ മുഖം നോക്കാതെ നടപടിയെടുക്കണമെന്ന കർശന നിർദേശമായിരുന്നു പോലീസിന് ലഭിച്ചിരുന്നത്. മുഖ്യമന്ത്രി യോഗി ആദിത്യനാഥിന്റെ നിർദേശപ്രകാരം സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണ് യുപി പോലീസ്.
ഇതാദ്യമായല്ല നൂപുർ ശർമ്മയ്‌ക്കെതിരെ മതമൗലികവാദികൾ വധഭീഷണിയുമായി എത്തുന്നത്. നൂപുർ ശർമ്മയെ വധിക്കുന്നവർക്ക് പാരിതോഷികം നൽകുമെന്ന് അറിയിക്കുന്നവരും, കൊല്ലുമെന്ന് പരസ്യമായും രഹസ്യമായും ഭീഷണിപ്പെടുത്തുന്നുവരും ഇക്കൂട്ടത്തിലുണ്ട്. നൂപുർ ശർമ്മയുടെ തലവെട്ടാനും നാവറുക്കാനുമെല്ലാം ആഹ്വാനം ചെയ്ത സംഭവങ്ങളും നേരത്തെ റിപ്പോർട്ട് ചെയ്തിരുന്നു.
Comments