ഗാന്ധിനഗർ: ഇന്ത്യയിലാദ്യമായി അപൂർവ്വ രക്തഗ്രൂപ്പ് കണ്ടെത്തി. ലോകത്തിൽ തന്നെ വളരെ അപൂർവ്വമായി മാത്രം കണ്ടുവരുന്ന രക്തഗ്രൂപ്പാണിതെന്നാണ് റിപ്പോർട്ട്. ഗുജറാത്ത് സ്വദേശിയായ ഹൃദ്രോഗിയുടെ രക്തഗ്രൂപ്പ് പരിശോധിച്ചപ്പോഴാണ് അപൂർവ്വ രക്തഗ്രൂപ്പ് ഇന്ത്യയിൽ സ്ഥിരീകരിച്ചത്.
ഇഎംഎം നെഗറ്റീവ് എന്ന ഗ്രൂപ്പാണിതെന്ന് ആശുപത്രി അധികൃതർ അറിയിച്ചു. നിലവിലുള്ള ‘എ’, ‘ബി’, ‘ഒ’ അല്ലെങ്കിൽ ‘എബി’ ഗ്രൂപ്പുകളുടെ കീഴിൽ വരാത്ത രക്തഗ്രൂപ്പാണ് ഇഎംഎം നെഗറ്റീവ്. ആദ്യമായാണ് ഇന്ത്യയിൽ ഇഎംഎം നെഗറ്റീവ് എന്ന രക്തഗ്രൂപ്പ് മനുഷ്യനിൽ കണ്ടെത്തുന്നത്.
പൊതുവേ, മനുഷ്യശരീരത്തിൽ നാല് തരം രക്തഗ്രൂപ്പുകളാണ് ഉള്ളത്. അവയിൽ A, B, O, Rh, Duffy എന്നിങ്ങനെ 42 തരം വ്യത്യസ്ത ഘടകങ്ങളുണ്ട്. കൂടാതെ 375 തരം ആന്റിജനുകളുമുണ്ട്. ഈ ആന്റിജനുകളിൽ പൊതുവെ ഇഎംഎമ്മിന്റെ അളവ് കൂടുതലായി കാണപ്പെടുന്നു. ഒരു തരം റെഡ് സെൽ ആന്റിജനുകളാണ് ഇഎംഎം. എല്ലാവരുടെയും രക്തത്തിൽ അതിനാൽ ഇഎംഎം അടങ്ങിയിരിക്കും. എന്നാൽ രക്തത്തിൽ ഹൈ-ഫ്രീക്വൻസി ആന്റിജനായ ഇഎംഎം ഇല്ലാത്ത അപൂർവ്വമാളുകൾ മാത്രമാണുള്ളത്. ലോകത്ത് തന്നെ പത്ത് പേരെ മാത്രമേ അത്തരത്തിൽ കണ്ടെത്തിയിട്ടുള്ളൂ. അപൂർവ്വമായി ഇത്തരത്തിൽ ഇഎംഎം ഇല്ലാത്ത രക്തഗ്രൂപ്പുള്ളവർക്ക് രക്തം ദാനം ചെയ്യാനും കഴിയുകയില്ല. കൂടാതെ മറ്റൊരാളിൽ നിന്നും രക്തം വാങ്ങാനും ഇത്തരക്കാർക്ക് കഴിയില്ല.
ഗുജറാത്തിലെ ഹൃദ്രോഗിയിൽ ഇഎംഎം നെഗറ്റീവ് എന്ന രക്തഗ്രൂപ്പ് കണ്ടെത്തുന്നതുവരെ ലോകത്ത് ഒമ്പത് പേർക്ക് മാത്രമായിരുന്നു അപൂർവ്വ രക്തഗ്രൂപ്പ് ഉണ്ടായിരുന്നത്. എന്നാൽ രാജ്‌കോട്ട് സ്വദേശിയുടെ പരിശോധനാഫലം പുറത്തുവന്നതോടെ ഇഎംഎം നെഗറ്റീവ് ഗ്രൂപ്പുള്ള പത്താമത്തെയാളെ ലോകം രേഖപ്പെടുത്തി. രക്തത്തിൽ ഇഎംഎമ്മിന്റെ അഭാവം വരുന്നതുകൊണ്ടാണ് ഇത്തരക്കാരുടെ രക്തഗ്രൂപ്പിന് ഇഎംഎം നെഗറ്റീവ് എന്ന് പേരിട്ടിരിക്കുന്നത്. ഇന്റർനാഷണൽ സൊസൈറ്റി ഓഫ് ബ്ലഡ് ട്രാൻസ്ഫ്യൂഷൻ (ഐഎസ്ബിടി) ആണ് നാമകരണം ചെയ്തത്.
ഹൃദയാഘാതത്തെത്തുടർന്ന് അഹമ്മദാബാദിൽ ചികിത്സയിലായിരുന്ന 65 കാരനായ രോഗിക്ക് ഹൃദയശസ്ത്രക്രിയയ്‌ക്ക് രക്തം ആവശ്യമായി വന്നു. രക്തഗ്രൂപ്പ് പരിശോധിച്ചപ്പോൾ സംശയം തോന്നിയതോടെ രക്തസാമ്പിൾ അമേരിക്കയിലേക്ക് അയക്കുകയായിരുന്നു. തുടർന്നാണ് അപൂർവ രക്തഗ്രൂപ്പാണ് രോഗിക്കുള്ളതെന്ന് കണ്ടെത്തിയത്.
