ചണ്ഡീഗഢ്: പഞ്ചാബിലെ ബട്ടീന്ദയിൽ മഹാത്മാ ഗാന്ധിയുടെ പ്രതിമ അജ്ഞാതർ നശിപ്പിച്ചു. രാമൻ മണ്ഡിയിലെ പൊതുപാർക്കിൽ സ്ഥാപിച്ച ഗാന്ധിപ്രതിമയാണ് സാമൂഹ്യവിരുദ്ധർ നശിപ്പിച്ചത്. പ്രതിമയുടെ തലയും കൈകാലുകളും വെട്ടിമാറ്റിയ നിലയിലാണ്.
സംഭവത്തിൽ രാമൻ മണ്ഡി പോലീസ് കേസ് എടുത്ത് അന്വേഷണം ആരംഭിച്ചു. പ്രദേശത്തെ സിസിടിവി ദൃശ്യങ്ങൾ പരിശോധിച്ച് വരികയാണെന്നും അക്രമികളെ ഉടൻ കണ്ടെത്തുമെന്നും പോലീസ് ഉറപ്പ് നൽകി. പ്രതിമ തകർത്തതിന് പിന്നിൽ ഖാലിസ്ഥാൻ ഭീകരരാണോ എന്ന സംശയവും നിലനിൽക്കുന്നതായി പോലീസ് വ്യക്തമാക്കി.
സംഭവത്തെ പ്രദേശവാസികൾ ശക്തമായി അപലപിക്കുകയും കുറ്റക്കാർക്കെതിരെ കർശനമായ നടപടി സ്വീകരിക്കണമെന്നും ആവശ്യപ്പെട്ടു. പ്രതിമ തകർത്തതിന് പിന്നിലുള്ളവരെ കണ്ടെത്താൻ പൂർണ്ണമായ സഹായം നൽകുമെന്ന് പ്രദേശവാസികൾ വ്യക്തമാക്കി.
