കമണ്ഡലു എന്ന് നാം കേട്ടിരിക്കും.. പണ്ട് ഋഷിവര്യന്മാർ ഉപയോഗിച്ചിരുന്ന പ്രത്യേകതരം പാത്രമാണിത്. പുരാതനകാലത്ത് വ്യാപകമായി കണ്ടുവന്നിരുന്ന കമണ്ഡലു, ഒരു വൃക്ഷത്തിന്റെ ഫലമാണെന്ന് നിങ്ങൾക്കറിയാമോ? തിരുവോട്ടുക്കായ് എന്നറിയപ്പെടുന്ന മരമാണ് കമണ്ഡലു നിർമിക്കാനുള്ള ഫലം നൽകുന്നത്. അതിനാൽ ഈ മരം കമണ്ഡലു വൃക്ഷം എന്നും അറിയപ്പെടുന്നു. കാലാബാഷ് ട്രീ എന്നാണിതിന്റെ മറ്റൊരു പേര്..
കമണ്ഡലു വൃക്ഷത്തിലെ കായ്കളുടെ അകക്കാമ്പ് കളഞ്ഞ് അവയിൽ ദ്വാരങ്ങളുണ്ടാക്കുകയും അതിലൂടെ വള്ളികൾ കടത്തി തൂക്കുപാത്രത്തിന് സമാനമായി ഉപയോഗിക്കുകയുമാണ് പണ്ടുള്ളവർ ചെയ്തിരുന്നത്. വളരെയേറെ കട്ടിയുള്ള പുറംതോടായതിനാൽ ഇവ പെട്ടെന്ന് ഉടയുകയില്ലെന്നതാണ് പ്രത്യേകത. അതിനാൽ കമണ്ഡലു പാത്രങ്ങൾ ദീർഘകാലം നിലനിൽക്കുന്നു. അതിലുപരി കമണ്ഡലുവിൽ നിറച്ച വെള്ളം കുടിക്കുന്നത് അത്യധികം നല്ലതാണെന്നും വെള്ളത്തിന് ഔഷധഗുണമുണ്ടെന്നുമാണ് പഴമക്കാർ പറയുന്നത്.
എന്നാലിന്ന് കമണ്ഡലു ഉപയോഗിച്ചുള്ള പാത്രങ്ങളും വസ്തുക്കളും അപൂർവ്വമാണ്. കാരണം, കേരളത്തിൽ തന്നെ വളരെ ചുരുക്കം ചിലയിടങ്ങളിൽ മാത്രമാണ് കമണ്ഡലു മരമുള്ളത്. ഈയിടെ ആലുവയിലുള്ള അദ്വൈതാശ്രമ പരിസരത്ത് കമണ്ഡലു മരം കായ്ച്ചുനിൽക്കുന്ന കാഴ്ച വാർത്തകളിൽ ഇടം പിടിച്ചിരുന്നു. ഏകദേശം ഏഴ് വർഷം മുമ്പ് ആശ്രമത്തിൽ നട്ട മരമാണ് ഇപ്പോൾ സന്ദർശകർക്ക് കൗതുകമായി നിൽക്കുന്നത്.
