ന്യൂഡൽഹി : ഇതുവരെ രാജ്യത്ത് രജിസ്റ്റർ ചെയ്ത ഇലക്ട്രിക് വാഹനങ്ങളുടെ വിവരങ്ങൾ പുറത്തു വിട്ട് കേന്ദ്രസർക്കാർ. കേന്ദ്രമന്ത്രി നിതിൻ ഗഡ്കരിയാണ് ഇലക്ട്രിക് വാഹനങ്ങളുടെ വിശദവിവരങ്ങൾ പുറത്ത് വിട്ടത്. രാജ്യത്ത് ഇതുവരെ സ്ഥാപിച്ച ഇലക്ട്രിക് ചാർജിംഗ് സ്റ്റേഷനുകളുടെ വിവരങ്ങളും ഗഡ്കരി പുറത്തുവിട്ടു.
ഇതുവരെ 13,34,385 ഇലക്ട്രിക് വാഹനങ്ങളാണ് രാജ്യത്ത് രജിസ്റ്റർ ചെയ്തിരിക്കുന്നത്. തെലങ്കാന, മദ്ധ്യപ്രദേശ്, ആന്ധ്ര പ്രദേശ്, ലക്ഷദ്വീപ് എന്നീ സംസ്ഥാനങ്ങൾ ഒഴിച്ചുള്ള കണക്കാണിത്. 2,826 ചാർജിംഗ് സ്റ്റേഷനുകളും രാജ്യത്ത് ഇതുവരെ സ്ഥാപിച്ചു കഴിഞ്ഞെന്നും മന്ത്രി വ്യക്തമാക്കി.
ലോകത്ത് രജിസ്റ്റർ ചെയ്തിരിക്കുന്ന വാഹനങ്ങളിൽ 13.27 ശതമാനം വാഹനങ്ങളാണ് ഇന്ത്യയിൽ ഉള്ളത്. വാഹനാപകടങ്ങളിൽ 26.37 ശതമാനവും നടക്കുന്നതും ഇന്ത്യയിലാണെന്ന് മന്ത്രി വ്യക്തമാക്കി. ടോൾ പിരിവുകളെക്കുറിച്ച് പരാതികൾ വന്നിട്ടുണ്ടെന്നും ദേശീയ പാത അതോറിറ്റി വിവരങ്ങൾ പരിശോധിച്ച് വരികയാണെന്നും മന്ത്രി ഒരു ചോദ്യത്തിനു മറുപടിയായി കൂട്ടിച്ചേർത്തു.
