മുംബൈ: ഇന്ത്യൻ പ്രീമിയർ ലീഗിലെ പ്രമുഖ ടീമുകളുടെ ഉടമകൾ ദക്ഷിണാഫ്രിക്കയിൽ തുടങ്ങാനിരിക്കുന്ന ട്വന്റി 20 ലീഗിൽ ടീമുകളെ സ്വന്തമാക്കിയതായി റിപ്പോർട്ട്. കേപ് ടൗൺ നഗരത്തിന്റെ ടീമിനെയാകും റിലയൻസ് സ്വന്തമാക്കുക എന്നാണ് വിവരം. ദക്ഷിണാഫ്രിക്കൻ ലീഗിലെ ആറ് ടീമുകളെയും സ്വന്തമാക്കിയിരിക്കുന്നത് ഐപിഎൽ ഫ്രാഞ്ചൈസി ഉടമകളാണ് എന്നാണ് പുറത്തു വരുന്ന വിവരം.
ജോഹന്നാസ്ബർഗ് ആസ്ഥാനമായുള്ള ടീമിനെ വാങ്ങിയിരിക്കുന്നത് ചെന്നൈ സൂപ്പർ കിംഗ്സ് ഉടമകളാണ്. ഡൽഹി ക്യാപിറ്റൽസിന്റെ ഉടമസ്ഥരായ ജെ എസ് ഡബ്ലിയു സ്റ്റീൽ ആണ് പ്രിട്ടോറിയ ആസ്ഥാനമായുള്ള ഫ്രാഞ്ചൈസിയെ സ്വന്തമാക്കിയത്. ലഖ്നൗ സൂപ്പർ ജയന്റ്സ് ഉടമകൾ ഡർബൻ ടീമിനെയും സൺറൈസേഴ്സ് ഹൈദരാബാദ് ഉടമകൾ പോർട്ട് എലിസബത്ത് ടീമിനെയും രാജസ്ഥാൻ റോയൽസ് ഉടമകൾ പാൾ ടീമിനെയുമാണ് സ്വന്തമാക്കിയിരിക്കുന്നത് എന്ന് അന്താരാഷ്‌ട്ര മാദ്ധ്യമം റിപ്പോർട്ട് ചെയ്യുന്നു.
2023 ജനുവരിയിൽ ദക്ഷിണാഫ്രിക്കൻ ലീഗ് ആരംഭിക്കും എന്നാണ് വിവരം. റൗണ്ട് റോബിൻ അടിസ്ഥാനത്തിൽ മുന്നിൽ എത്തുന്ന ടീമുകൾ പ്ലേ ഓഫിലേക്ക് മുന്നേറും. ഐപിഎൽ ഫ്രാഞ്ചൈസി കൊൽക്കത്ത നൈറ്റ് റൈഡേഴ്സിന് ട്രിൻബാഗോ നൈറ്റ് റൈഡേഴ്സ് എന്ന പേരിൽ കരീബിയൻ പ്രീമിയർ ലീഗിൽ നിലവിൽ ടീമുണ്ട്.
