സോണിയ ഗാന്ധിയെ ഇന്ന് ഇഡി ചോദ്യം ചെയ്യും; തെരുവിൽ പ്രതിഷേധം നടത്താനൊരുങ്ങി കോൺഗ്രസ്

ന്യൂഡൽഹി : നാഷണൽ ഹെറാൾഡ് കേസിൽ കോൺഗ്രസ് അദ്ധ്യക്ഷ സോണിയ ഗാന്ധിയെ എൻഫോഴ്‌സ്‌മെന്റ് ഡയറക്ടറേറ്റ് ഇന്ന് ചോദ്യം ചെയ്യും. പതിനൊന്നരയ്‌ക്ക് ഇഡി ഓഫീസിൽ വെച്ചാകും ചോദ്യം ചെയ്യൽ. കോൺഗ്രസ് ഹെഡ് ക്വാർട്ടേഴ്‌സിൽ നിന്ന് 11 മണിയോടെ സോണിയ പുറപ്പെടും.

ഇത് ആദ്യമായാണ് ഒരു അന്വേഷണ ഏജൻസി കോൺഗ്രസ് അദ്ധ്യക്ഷയെ ചോദ്യം ചെയ്യുന്നത്. രാഹുൽ ഗാന്ധിയെ ചോദ്യം ചെയ്തപ്പോൾ നടത്തിയ പ്രതിഷേധത്തിന് സമാനമായി സോണിയ ഗാന്ധിയെ ചോദ്യം ചെയ്യുമ്പോഴും പാർട്ടി നേതാക്കൾ തെരുവിൽ ഇരുന്ന് പ്രതിഷേധിക്കും. പ്രതിഷേധം നടത്താൻ പാർട്ടി നേതൃത്വവും നിർദ്ദേശം നൽകിയിട്ടുണ്ട്.

നാഷണൽ ഹെറാൾഡ് കേസിൽ ചോദ്യം ചെയ്യലിനായി സോണിയ ഗാന്ധിക്ക് നേരത്തെ നോട്ടീസ് അയച്ചിരുന്നു. രാഹുലിന്റെ ചോദ്യം ചെയ്യലിന് ശേഷം ഹാജരാകാനായിരുന്നു നിർദ്ദേശം. എന്നാൽ കൊറോണ ബാധിച്ച് ആശുപത്രിയിലാണെന്ന് സോണിയ അറിയിച്ചു. തുടർന്നാണ് നടപടി മറ്റൊരു ദിവസത്തേക്ക് മാറ്റിവെച്ചത്.

ഡൽഹിയിലെ ഇഡി ഓഫീസിൽ വെച്ച് 5 ദിവസമെടുത്ത് 50 മണിക്കൂറാണ് രാഹുലിനെ ചോദ്യം ചെയ്തത്.