ബിജു മേനോനെ പ്രധാന കഥാപാത്രമായി നവാഗതനായ ശ്രീജിത്ത് എൻ. സംവിധാനം ചെയ്യുന്ന ‘ഒരു തെക്കൻ തല്ല് കേസ്’ എന്ന ചിത്രത്തിന്റെ ടീസർ പുറത്തിറക്കി. ഏറെ വ്യത്യസ്തമാർന്ന രീതിയിലാണ് അണിയറ പ്രവർത്തകർ ടീസർ പുറത്തിറക്കിയിരിക്കുന്നത്. സിനിമയുടെ പേര് പോലെ തന്നെ നാടൻ അടി തന്നെയാണ് ടീസറിലും കാണാൻ സാധിക്കുന്നത്.
ജി.ആർ. ഇന്ദുഗോപൻ രചിച്ച അമ്മിണിപ്പിള്ള വെട്ടുകേസ് എന്ന കഥയെ ആസ്പദമാക്കിയാണ് സിനിമ ഒരുക്കിയിരിക്കുന്നത്. തമാശകൾ കൂടി നിറഞ്ഞ ചിത്രമാണ് ‘ഒരു തെക്കൻ തല്ല് കേസ്’. ഇതുവരെ കണ്ടതിൽ നിന്നും വളരെ വ്യത്യസ്തമാർന്ന രൂപത്തിലാണ് അമ്മിണിപ്പിള്ള എന്ന കഥാപാത്രമായി ചിത്രത്തിൽ ബിജുമോനോൻ എത്തിയിരിക്കുന്നത്. റോഷൻ മാത്യു, പത്മപ്രിയ , നിമിഷ സജയൻ തുടങ്ങി നിരവധി താരങ്ങളും സിനിമയിൽ പ്രധാന കഥാപാത്രങ്ങളെ അവതരിപ്പിക്കുന്നു.
എൺപതുകളുടെ പശ്ചാത്തലത്തിൽ ഒരുക്കുന്ന പീരിയഡ് മൂവിയായ ‘ഒരു തെക്കൻ തല്ല് കേസ്’ E4 എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്തയും സി.വി. സാരഥിയും ചേർന്നാണ് നിർമ്മിച്ചിരിക്കുന്നത്. ഓണം റിലീസായി സെപ്റ്റംബർ 8 നാണ് ചിത്രം തിയറ്ററിൽ എത്തുന്നത്.
