ന്യൂഡൽഹി: ലോക അത്ലറ്റിക്സ് ചാമ്പ്യൻഷിപ്പിൽ മെഡൽ നേടിയ ജാവ്ലിൻ താരം നീരജ് ചോപ്രയെ അഭിനന്ദിച്ച് പ്രധാനമന്ത്രി നരേന്ദ്ര മോദി. ഇന്ത്യൻ കായിക രംഗത്തിന് ഇത് അപൂർവ്വ നിമിഷമാണെന്ന് അദ്ദേഹം ട്വീറ്റ് ചെയ്തു. ചാമ്പ്യൻ ഷിപ്പിൽ വെള്ളി മെഡൽ നേടിയാണ് നീരജ് ചോപ്ര രാജ്യത്തിന്റെ അഭിമാനം ഉയർത്തിയത്.
ഞങ്ങളുടെ ഏറ്റവും വിശിഷ്ട കായികതാരങ്ങളിൽ ഒരാളുടെ മഹത്തായ നേട്ടം. വേൾഡ് അത്ലറ്റിക്സ് ചാമ്പ്യൻ ഷിപ്പിൽ വെള്ളി മെഡൽ നേടി ചരിത്രം രചിച്ച നീരജ് ചോപ്രയ്ക്ക് അഭിനന്ദനങ്ങൾ. ഇന്ത്യൻ കായിക രംഗത്തിന് ഇതൊരു അപൂർവ്വ നിമിഷമാണ്. വരും മത്സരങ്ങളിലും വിജയം കൈവരിക്കാൻ ആശംസകൾ നേരുന്നു- പ്രധാനമന്ത്രി ട്വീറ്റ് ചെയ്തു.
പ്രധാനമന്ത്രിയ്ക്ക് പുറമേ കേന്ദ്ര പ്രതിരോധ മന്ത്രി രാജ്നാഥ് സിംഗ്, നിയമകാര്യ മന്ത്രി കിരൺ റിജ്ജുജു, കേന്ദ്ര വിദേശകാര്യ സഹമന്ത്രി വി. മുരളീധരൻ തുടങ്ങിയവരും നീരജ് ചോപ്രയ്ക്ക് അഭിനന്ദനങ്ങൾ നേർന്നിട്ടുണ്ട്.
നീരജ് ചോപ്രയുടെ തകർപ്പൻ പ്രകടനത്തിൽ ഇന്ത്യ ആഹ്ലാദിക്കുന്നുവെന്ന് രാജ്നാഥ് സിംഗ് പറഞ്ഞു. ലോക അത്ലറ്റിക്സ് ചാമ്പ്യൻഷിപ്പിൽ വെള്ളി മെഡൽ നേടിയ നീരജിന് അഭിനന്ദനങ്ങൾ. അദ്ദേഹത്തിന്റെ കഠിനാധ്വാനവും നിശ്ചയദാർഢ്യവും മികച്ച നേട്ടം നേടിത്തന്നു. നീരജ് ചോപ്രയെ ഓർത്ത് അഭിമാനം കൊള്ളുന്നവെന്നും അദ്ദേഹം വ്യക്തമാക്കി.
ലോക അത്ലറ്റിക്സ് ചാമ്പ്യൻഷിപ്പിൽ വെള്ളി മെഡൽ നേടി നീരജ് ചോപ്ര ചരിത്രം കുറിച്ചതായി കിരൺ റിജ്ജുജു ട്വീറ്റ് ചെയ്തു. മത്സരത്തിൽ മെഡൽ നേടുന്ന ആദ്യ പുരുഷ താരവും, രണ്ടാമത്തെ ഇന്ത്യൻ താരവുമാണ് അദ്ദേഹം. 2003 ൽ ലോംഗ് ജംപിൽ അഞ്ജു ബോബി ജോർജ് ആയിരുന്നു മെഡൽ സ്വന്തമാക്കിയ ആദ്യ ഇന്ത്യൻ താരമെന്നും അദ്ദേഹം പറഞ്ഞു. ലോക അത്ലറ്റിക്സ് ചാമ്പ്യൻ ഷിപ്പിൽ വെള്ളിമെഡൽ നേടി ചരിത്രം കുറിച്ച നീരജ് ചോപ്രയ്ക്ക് അഭിനന്ദനങ്ങൾ നേരുന്നതായി മുരളീധരനും വ്യക്തമാക്കി.
Comments