തിരുവനന്തപുരം: ക്യൂബ വികസിപ്പിച്ച പ്രത്യേകതരം ഔഷധങ്ങളെക്കുറിച്ച് മുഖ്യമന്ത്രി പിണറായി വിജയനുമായി ചര്‍ച്ച നടത്തി ക്യൂബന്‍ അംബാസിഡര്‍ അലെഹാന്ദ്രോ സിമന്‍കാസ് മാരിന്‍. തിരുവനന്തപുരത്ത് നടന്ന കൂടിക്കാഴ്ചിലായിലായിരുന്നു ആരോഗ്യമേഖലയില്‍ മാറ്റങ്ങള്‍കൊണ്ടുവരാന്‍ ഉദ്ദേശിച്ചുള്ള ചര്‍ച്ചകള്‍ നടന്നത്. വിഷയത്തില്‍ കൂട്ടായ ഗവേഷണത്തിനുള്ള സാധ്യതകളെക്കുറിച്ചും ഇരുവരും സംസാരിച്ചു.
ചെഗുവേരയുടെ കാലം മുതല്‍ തങ്ങള്‍ക്ക് അന്താരാഷ്‌ട്രതലത്തില്‍ ആരോഗ്യ മേഖലയിലെ സഹകരണത്തില്‍ വലിയ അനുഭവസമ്പത്തുണ്ടെന്ന് ക്യൂബന്‍ സ്ഥാനപതി പറഞ്ഞു. ജനറല്‍ മെഡിസിന്‍, സ്പെഷ്യാലിറ്റി മെഡിസിന്‍ എന്നീ രംഗങ്ങളില്‍ കേരളവുമായി സഹകരിക്കാനാകും. ആരോഗ്യം, ശാസ്ത്രസാങ്കേതിക രംഗം, ഉന്നത വിദ്യാഭ്യാസം, കൃഷി എന്നീ മേഖലയിലുള്ള പരസ്പര സഹകരണത്തിനുള്ള സാധ്യതകള്‍ തേടുമെന്നും അലെഹാന്ദ്രോ മാരിന്‍ പറഞ്ഞു.
ആരോഗ്യ വകുപ്പ് മന്ത്രി വീണാ ജോര്‍ജുമായും ക്യൂബന്‍ അംബാസഡര്‍ അലജാന്ദ്രോ സിമന്‍കാസ് മാരിന്‍ കൂടിക്കാഴ്ച നടത്തി. ക്യൂബ എങ്ങനെയാണ് കോവിഡ് മഹാമാരിയെ നേരിട്ടതെന്ന് വിവരിച്ച അദ്ദേഹം കേരളത്തിലെ വൈറസ് പ്രതിരോധ പ്രവര്‍ത്തനങ്ങളെയും വിലയിരുത്തി. കുടുംബ ഡോക്ടര്‍ പദ്ധതി, റഫറല്‍ സംവിധാനങ്ങള്‍, വാക്സിന്‍, മരുന്ന് ഉദ്പാദനം തുടങ്ങി മേഖലകളില്‍ സഹകരിക്കുമെന്നും അംബാസിഡര്‍ പറഞ്ഞു.
മുഖ്യമന്ത്രിയ്‌ക്കൊപ്പമുള്ള കൂടിക്കാഴ്ചയില്‍ ചീഫ് സെക്രട്ടറി ഡോ. വി.പി ജോയി, മുഖ്യമന്ത്രിയുടെ ചീഫ് പ്രിന്‍സിപ്പല്‍ സെക്രട്ടറി ഡോ. കെ.എം അബ്രഹാം എന്നിവര്‍ പങ്കെടുത്തു. ആരോഗ്യ വകുപ്പ് അഡിഷണല്‍ ചീഫ് സെക്രട്ടറി, ഉന്നത വിദ്യാഭ്യാസ സെക്രട്ടറി എന്നിവരും ചര്‍ച്ചകളില്‍ ഭാഗമായി.
