നെറ്റ്ഫ്ളിക്സ് ഇന്ന് ഏവർക്കും സുപരിചിതമാണ്. അതിൽ നിരവധി ആരാധകരുള്ള വെബ് സീരീസാണ് ബ്രേക്കിംഗ് ബാഡ്. എന്നാൽ ഇതിന്റെ സ്ട്രീമിംഗ് നെറ്റ്ഫ്ളിക്സ് അവസാനിപ്പിക്കുന്നു എന്ന വിവരങ്ങളാണ് പുറത്ത് വരുന്നത്. നിർമ്മാതാക്കളായ സോണി ടെലിവിഷനും നെറ്റ്ഫ്ളിക്സും തമ്മിൽ ബ്രേക്കിംഗ് ബാഡിനായി ഉള്ള കരാർ 2025 ഫെബ്രുവരി 10 ന് അവസാനിക്കും. ഈ കരാർ നീട്ടാൻ ഇരുകൂട്ടരും തയ്യറായില്ലെങ്കിൽ ബ്രേക്കിംഗ് ബാഡ് സ്ട്രീമിംഗ് നെറ്റ്ഫിളിക്സ് അവസാനിപ്പിക്കും.
നിലവിലെ സാഹചര്യത്തിൽ ഇത്രയേറെ കാഴ്ച്ചക്കാരുള്ള പരമ്പരയെ നെറ്റ്ഫ്ളിക്സ് തള്ളിക്കളയില്ല. അതിനാൽ തന്നെ സോണി ടെലിവിഷനുമായുള്ള കരാർ നീട്ടാനാണ് സാധ്യതയും. കരാർ അവസാനിക്കാൻ ഇനി മൂന്ന് വർഷത്തെ സാവകാശം കൂടെയുണ്ട്. അതിനാൽ വരും വർഷങ്ങളിൽ പരമ്പരയ്ക്ക് ലഭിക്കുന്ന ജനപിന്തുണ കൂടി പരിഗണിച്ചാവും നെറ്റ് ഫ്ളിക്സ് തീരുമാനം എടുക്കുക.
2008ലാണ് ബ്രയാൻ ക്രാൻസ്റ്റൺ, ആരോൺ പോൾ എന്നിവർ മുഖ്യ കഥാപാത്രങ്ങളായി എത്തുന്ന പരമ്പര ആരംഭിച്ചത്. 5 സീസണുകളിലായി 62 എപ്പിസോഡുകളാണ് ബ്രേക്കിംഗ് ബാഡിൽ ഉള്ളത്. അമേരിക്കൻ ടിവി ചാനലായ എഎംസിയിലൂടെയാണ് ഇത് സംപ്രേഷണം ചെയ്യുന്നത്. ഒടിടി അവകാശമാണ് നെറ്റ്ഫ്ളിക്സിനുള്ളത്. 2013 ലാണ് പരമ്പരയുടെ അവസാന എപ്പിസോഡ് റിലീസ് ആയത്. എന്നാൽ ഇന്നും ഏറ്റവുമധികം കാഴ്ചക്കാരുള്ള സീരിസുകളിൽ ഒന്നാണ് ഇത്.
