വാഴപ്പഴത്തിന്റെ ഗുണങ്ങളെക്കുറിച്ചും വാഴപ്പഴം കഴിക്കേണ്ടതിന്റെ ആവശ്യകതയെക്കുറിച്ചും നമുക്കെല്ലാവർക്കും അറിയാവുന്നതാണ്. പഴം കഴിച്ചു കഴിഞ്ഞ് അതിന്റെ തൊലി വെറുതെ ചവറ്റുകൊട്ടയിൽ കളയുകയാണ് പതിവ്. എന്നാലിനി തൊലി വെറുതെ കളയാൻ വരട്ടെ, തൊലി കൊണ്ടും നിരവധി ഉപയോഗങ്ങൾ ഉണ്ട്. പഴത്തെക്കാളധികം ഗുണങ്ങൾ പഴത്തൊലിയിലുണ്ടെന്നാണ് പഠനങ്ങൾ തെളിയിക്കുന്നത്. പഴത്തൊലിയുടെ ചില ഉപയോഗങ്ങൾ താഴെ വായിക്കാം.
1. പഴത്തൊലിയുടെ ഉൾക്കാമ്പ് ദിവസവും പല്ലിൽ ഉരക്കുന്നത് പല്ലിന് കൂടുതൽ വെണ്മ സമ്മാനിക്കുന്നു. ഇതിലടങ്ങിയിരിക്കുന്ന പൊട്ടാസ്യം, മാംഗനീസ്, മഗ്‌നീഷ്യം എന്നിവയുടെ സാന്നിദ്ധ്യമാണ് പല്ല് വെളുക്കാൻ സഹായിക്കുന്നത്.
2. ഷൂ പോളിഷായി ഉപയോഗിക്കാം. തൊലിയുടെ ഉൾഭാഗം ഷൂസിൽ ഉരസിയതിനു ശേഷം വൃത്തിയുള്ള തുണി വച്ച് തുടച്ചെടുക്കുക. നിങ്ങളുടെ ഷൂസ് മുൻപത്തേതിലും അധികം തിളങ്ങും.
3. മുഖക്കുരുവിലും കൊതുക് കടിക്കുമ്പോൾ ഉണ്ടാകുന്ന പാടിലും തൊലി ഉരസുകയാണെങ്കിൽ അവ വളരെ വേഗം മായുന്നതാണ്.
4. മാംസത്തെ മൃദുവാക്കാൻ ഉപയോഗിക്കാം. പാചകം ചെയ്യുന്നതിന് അൽപ്പസമയം മുൻപ് പലപ്പോഴും മാംസം മാരിനേറ്റ് ചെയ്യാറുണ്ട്. പഴത്തിന്റെ തൊലി ഉപയോഗിച്ച് ഇങ്ങനെ ചെയ്യുന്നത് മാംസത്തെ മൃദുവും ജ്യൂസിയും ആക്കുന്നു.
5. തൊലിപ്പുറത്തുണ്ടാകുന്ന ചൊറിച്ചിൽ മാറ്റാൻ ഉപയോഗിക്കാം. ഇങ്ങനെ ചെയ്ത് നിമിഷ നേരത്തിനുള്ളിൽ തന്നെ വ്യത്യാസം മനസിലാക്കാം.
6. ചെടികൾക്ക് നല്ലൊരു വളമാണിത്. പഴത്തൊലി ചെടിയുടെ വളർച്ചയെ ദ്രുതഗതിയിലാക്കുന്നു. കംപോസ്റ്റ് ചെയ്ത് മണ്ണിലിടുന്നതാണ് ഉത്തമം.
7. സ്മൂത്തി ഉണ്ടാക്കാനും ഉണക്കി ഉപ്പേരി പോലെ വറുത്തെടുക്കുവാനും നല്ലതാണ്.
