ബർമിങ്ഹാം: കോമൺവെൽത്ത് ഗെയിംസിൽ ഭാരോദ്വഹനത്തിൽ വെങ്കല മെഡൽ നേടിയ ഗുരുരാജ പൂജാരിയെ അഭിനന്ദിച്ച് പ്രധാനമന്ത്രി നരേന്ദ്രമോദി. ദൃഢനിശ്ചയത്തിന്റെ തെളിവാണ് ഗുരുരാജ പൂജാരിയുടെ മെഡൽനേട്ടമെന്ന് പ്രധാനമന്ത്രി ട്വിറ്ററിൽ കുറിച്ചു. നേട്ടത്തിൽ അതിയായ സന്തോഷമുണ്ടെന്നും അദ്ദേഹം പറഞ്ഞു.
കായിക യാത്രയിൽ ഇനിയും ഗുരുരാജ പൂജാരിക്ക് അനേകം നാഴികകല്ലുകൾ താണ്ടാൻ കഴിയട്ടെ എന്നും പ്രധാനമന്ത്രി ആശംസിച്ചു. പുരുഷൻമാരുടെ 61 കിലോ വിഭാഗം ഫൈനലിൽ 269 കിലോ ഭാരം ഉയർത്തിയാണ് ഗുരുരാജ പൂജാരി വെങ്കല മെഡൽ നേടിയത്. 2018 ലെ കോമൺവെൽത്ത് ഗെയിംസിൽ വെളളി മെഡൽ നേടിയ താരമാണ് ഗുരുരാജ.
രാഷ്‌ട്രപതി ദ്രൗപതി മുർമുവും കേന്ദ്ര കായിക മന്ത്രി അനുരാഗ് ഠാക്കൂറും ഗുരുരാജിനെ അഭിനന്ദിച്ചു. കോമൺവെൽത്ത് ഗെയിംസിൽ ഒരിക്കൽകൂടി ഇന്ത്യയുടെ അഭിമാനമുയർത്തിയിരിക്കുകയാണ് ഗുരുരാജ എന്ന് രാഷ്‌ട്രപതി പറഞ്ഞു. പ്രചോദനകരമായ നിരവധി ചുവടു വെയ്പുകൾക്കായി ആശംസകൾ നേരുകയാണെന്നും അവർ കൂട്ടിച്ചേർത്തു.
ഗുരുരാജയുടെ തുടർച്ചയായ രണ്ടാം മെഡലിൽ ആശംസകൾ അർപ്പിക്കുന്നതായി കായികമന്ത്രി അനുരാഗ് ഠാക്കൂർ ട്വിറ്ററിൽ കുറിച്ചു. നേരത്തെ ഭാരോദ്വഹനത്തിൽ തന്നെ വെളളി മെഡൽ നേടിയ സങ്കേത് സർഗാറിനെയും പ്രധാനമന്ത്രി അഭിനന്ദിച്ചിരുന്നു. 55 കിലോ വിഭാഗത്തിലാണ് സങ്കേത് വെളളി മെഡൽ നേടിയത്.
