ചെന്നൈ: തമിഴ്നാട്ടിൽ നഴ്സിംഗ് വിദ്യാർത്ഥിനി ആത്മഹത്യ ചെയ്തു. തമിഴ്നാട്ടിലെ തിരുവേർകാടാണ് സംഭവം. രണ്ടാം വർഷ നഴ്സിംഗ് വിദ്യാർത്ഥിനി ഹോസ്റ്റൽ മുറിയിൽ തൂങ്ങിമരിക്കുകയായിരുന്നു.
ഈറോഡ് സ്വദേശിനിയായ 19കാരി സുമതിയെ ശനിയാഴ്ച വൈകിട്ടാണ് ഹോസ്റ്റൽ മുറിയിൽ മരിച്ച നിലയിൽ കണ്ടെത്തിയത്. വിവരമറിഞ്ഞ് പോലീസ് സ്ഥലത്തെത്തി പരിശോധന നടത്തുകയും മൃതദേഹം പോസ്റ്റുമോർട്ടത്തിന് അയക്കുകയും ചെയ്തു. കേസ് സിബി-സിഐഡിക്ക് കൈമാറിയാതായി പോലീസ് അറിയിച്ചു. രക്ഷിതാക്കളുടെയും സഹപാഠികളുടെയും മൊഴിയെടുക്കുമെന്നും വിദ്യാർത്ഥിനിയുടെയുടെ ഫോൺ റെക്കോർഡുകൾ വിശദമായി പരിശോധിക്കുമെന്നും അന്വേഷണ സംഘം വ്യക്തമാക്കി.
കഴിഞ്ഞ രണ്ടാഴ്ചയ്ക്കിടെ തമിഴ്നാട്ടിൽ അഞ്ച് വിദ്യാർത്ഥികളാണ് ആത്മഹത്യ ചെയ്തത്. അദ്ധ്യാപകരുടെ പീഡനം ആരോപിച്ച് പ്ലസ്ടു വിദ്യാർത്ഥിനി ഹോസ്റ്റൽ കെട്ടിടത്തിൽ നിന്ന് ചാടി മരിച്ച സംഭവത്തോടെയാണ് തുടക്കം. ഇതിന് പിറകെ സമാന കാരണങ്ങൾ ചൂണ്ടിക്കാട്ടി പല വിദ്യാർത്ഥികളും ആത്മഹത്യ ചെയ്തിരുന്നു.
