മീരഭായ് ചാനുവിന്റെ സ്വർണ്ണനേട്ടം ത്രിവർണ്ണ പതാകയേന്തി ആഘോഷിച്ച് കുടുംബം; വീഡിയോ പങ്കുവെച്ച് ചാനു

ഇംഫാൽ:കോമൺവെൽത്ത് ഗെയിംസിൽ ഇന്ത്യയുടെ യശസ്സ് വാനോളം ഉയർത്തിയ മീരാഭായ് ചാനുവിന്റെ ജന്മനാട്ടിൽ വൻ ആഘോഷങ്ങൾ. കുടുംബം വിജയമാഘോഷിച്ചതിന്റെ വീഡിയോ ദൃശ്യങ്ങൾ, സമൂഹമാദ്ധ്യമങ്ങൾ ഏറ്റെടുത്തു കഴിഞ്ഞു. ത്രിവർണ്ണ പതാകയുമായി പരമ്പരാഗത നൃത്തം ചെയ്യുന്നതിന്റെ ദൃശ്യങ്ങൾ ‘വിജയാഘോഷത്തിൽ അമ്മയും കുടുംബവും’ എന്ന തലക്കെട്ടോടെ ചാനുവാണ് പങ്കുവെച്ചത്.

മണിപ്പൂരിലെ പരമ്പരാഗത നൃത്തമായ തബൽ ചോങ്ബയ്‌ക്ക് ചുവടു വെയ്‌ക്കുന്ന കുടുംബത്തെയാണ് ദൃശ്യങ്ങളിൽ കാണാൻ കഴിയുന്നത്.സാധാരണയായി അഞ്ച് ദിവസത്തെ ഹോളി ഉത്സവ സമയത്തും മറ്റ് ആഘോഷ ദിവസങ്ങളിലും സംഘടിപ്പിക്കുന്ന പരമ്പരാഗത നൃത്തമാണിത്.

My mom and other relatives celebrating victory at my home ✌️ pic.twitter.com/sTCIoTDVwM

— Saikhom Mirabai Chanu (@mirabai_chanu) July 31, 2022

വനിതകളുടെ ഭാരോദ്വഹനത്തിൽ 49 കിലോഗ്രാം വിഭാഗത്തിൽ 201 കിലോഗ്രാം ഉയർത്തിയാണ് സ്വർണ്ണം കരസ്ഥമാക്കിയത്. സ്നാച്ച് റൗണ്ടിൽ 88 കിലോ ഉയർത്തി കോമൺവെൽത്ത് റെക്കോർഡും മികച്ച വ്യക്തിഗത സ്‌കോറും സൃഷ്ടിച്ചു. രണ്ടാം ഘട്ടത്തിൽ 113 കിലോയും മൂന്നാമത്തേതിൽ 119 കിലോയും ഉയർത്തി മെഡൽ ഉറപ്പിക്കുകയായിരുന്നു ചാനു.വെള്ളി മെഡൽ നേടിയ മൗറീഷ്യസിന്റെ റോയ്ലിയ റനൈവോസോവയെക്കാൾ 29 കിലോഗ്രാം വ്യത്യാസത്തിലാണ് ചാനു സ്വർണ്ണം സ്വന്തമാക്കിയത്. കോമൺവെൽത്ത് ഗെയിംസിൽ രണ്ടാമത്തെ സ്വർണ്ണവും മൂന്നാമത്തെ മെഡലുമാണ് ബർമിങ്ങാം ഗെയിംസിൽ കരസ്ഥമാക്കിയത്.