ന്യൂഡൽഹി : രാജ്യതലസ്ഥാനത്ത് ഒരാൾക്ക് കൂടി മങ്കിപോക്സ് സ്ഥിരീകരിച്ചു. ഡൽഹിയിൽ താമസിക്കുന്ന മുപ്പത്തിയഞ്ചുകാരനായ നൈജീരിയൻ സ്വദേശിക്കാണ് രോഗം സ്ഥിരീകരിച്ചത്. അടുത്ത കാലത്ത് ഇയാൾ വിദേശ യാത്ര നടത്തിയിട്ടില്ലെന്നാണ് റിപ്പോർട്ട്. ഇതോടെ രാജ്യത്തെ ആകെ രോഗബാധിതരുടെ എണ്ണം ആറായി.
ഡൽഹിയിൽ രോഗബാധ സ്ഥിരീകരിച്ച രണ്ടാമത്തെ വ്യക്തിയാണ് നൈജീരിയൻ പൗരൻ. രോഗം സ്ഥിരീകരിച്ചതിനെ തുടർന്ന് ഇയാളെ ചികിത്സയ്ക്കായി നോഡൽ ആശുപത്രിയായ ഡൽഹി സർക്കാരിന്റെ നിയന്ത്രണത്തിലുള്ള എൽഎൻജെപിയിൽ പ്രവേശിപ്പിച്ചു.
കഴിഞ്ഞ അഞ്ച് ദിവസമായി ഇയാൾക്ക് പനിയും ശരീരത്തിൽ ചുണങ്ങുകളും ഉണ്ട്. ഇതിനെ തുടർന്ന് സാമ്പിൾ പൂനെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിലേക്ക് അയച്ചു.തിങ്കളാഴ്ച വൈകുന്നേരത്തോടെ എത്തിയ ഫലത്തിൽ രോഗം സ്ഥിരീകരിക്കുകയായിരുന്നു. അതേസമയം ആഫ്രിക്കൻ വംശജരായ രണ്ട് പേരെ കൂടി രോഗ ലക്ഷണങ്ങളോടെ ആശുപത്രിയിൽ പ്രവേശിപ്പിച്ചതായുള്ള റിപ്പോർട്ടുകളും പുറത്ത് വരുന്നുണ്ട്.
അഞ്ച് കേസുകളാണ് മുമ്പ് റിപ്പോർട്ട് ചെയ്തത്. കേരളത്തിൽ മൂന്ന്, ഡൽഹി, കർണ്ണാടക എന്നിവിടങ്ങളിൽ ഒരോന്ന് വീതം .
Comments