കോമൺവെൽത്ത് ഗെയിംസിൽ ഇന്ത്യയുടെ വനിത ക്രിക്കറ്റ് ടീം ഇന്ന് കളിക്കളത്തിൽ ഇറങ്ങും. സെമി ലക്ഷ്യമിട്ടാണ് ഇന്ത്യ ഇന്ന് എതിരാളികളെ നേരിടുക. മത്സരത്തിൽ ബാർബഡോസ് ആണ് ഇന്ത്യയുടെ എതിരാളികൾ. ഇന്ത്യൻ സമയം രാത്രി 10.30ന് എഡ്ജ്ബാസ്റ്റണിലാണ് മത്സരം നടക്കുക.
ഇന്ന് രണ്ട് ടീമിനും നിർണ്ണായക ദിനമാണ്. സെമിയിൽ ഓസ്‌ട്രേലിയയ്‌ക്കൊപ്പം ഗ്രൂപ്പ് എയിൽ നിന്ന് സെമിയിൽ ഇടംപിടിക്കണമെങ്കിൽ ഇന്ത്യയ്‌ക്ക് ഈ മത്സരം വിജയിക്കണം. മഴ മൂലം മത്സരം ഉപേക്ഷിച്ചാലും ഇന്ത്യയ്‌ക്ക് ഗുണം ചെയ്യും. രണ്ട് ടീമുകളും ഓരോ മത്സരം വീതമാണ് ജയിച്ചിട്ടുള്ളത്. ആദ്യ മത്സരത്തിൽ ഇന്ത്യ ഓസ്‌ട്രേലിയയോട് പരാജയപ്പെട്ടെങ്കിലും രണ്ടാം മത്സരത്തിൽ പാകിസ്താനെതിരെ എട്ട് വിക്കറ്റിന്റെ വിജയം നേടി വമ്പൻ തിരിച്ചുവരവ് നടത്തിയിരുന്നു.
ആദ്യ കളിയിലുണ്ടായ ബാറ്റിംഗ് തകർച്ചയിൽ ക്യാപ്റ്റൻ ഹർമൻപ്രീത് കൗർ മാത്രമാണ് മികച്ചുനിന്നത്. ആദ്യ കളിയിൽ യസ്തിക ഭാട്ടിയ മൂന്നാം നമ്പറിലിറങ്ങിയപ്പോൾ രണ്ടാമത്തെ കളിയിൽ സബ്ബിനേനി മേഘനയാണ് ഈ റോളിലെത്തിയത്. രണ്ട് പരീക്ഷണങ്ങളും അത്ര വിജയിച്ചില്ല. അതേസമയം ഇന്നത്തെ കളിയിൽ ഇന്ത്യൻ ടീമിന്റെ പ്രകടനം കാത്തിരിക്കുകയാണ് ആരാധകർ.
