സാൻറിയാഗോ: ചിലിയെ അമ്പരപ്പിച്ച് വിജനമായ ഭൂമിയിൽ സിംഗ്ഹോൾ (വലിയ ഗർത്തം) രൂപപ്പെട്ടു. 25 മീറ്റർ വീതിയും 200 മീറ്റർ ആഴവുമുള്ള സിംഗ്ഹോളാണ് വടക്കൻ ചിലിയുടെ ടിയേറ അമറില്ല മേഖലയിൽ രൂപ്പെട്ടത്. ആഴത്തിൽ രൂപപ്പെട്ടിട്ടുള്ള ഈ ഗർത്തം എങ്ങനെ സംഭവിച്ചുവെന്നതിൽ ഗവേഷണം തുടരുകയാണ്. സംഭവത്തിൽ വലിയ ദുരൂഹതയുണ്ടെന്നാണ് അധികൃതർ കരുതുന്നത്.
82 മീറ്റർ വ്യാസത്തിലുള്ള ഈ ദുരൂഹ ഗർത്തം അനുനിമിഷം വലുതാകുകയാണെന്നതാണ് ഒരേസമയം അമ്പരിപ്പിക്കുകയും പേടിപ്പിക്കുകയും ചെയ്യുന്നത്. സംഭവം നാഷണൽ സർവീസ് ഓഫ് ജിയോളജിയുടെ ഉദ്യോഗസ്ഥർ വിശദമായി അന്വേഷിച്ച് വരികയാണ്.
ഒരു കനേഡിയ ഖനി കമ്പനിയുടെ ഉടമസ്ഥതയിൽപ്പെട്ട ഭൂമിയിലാണ് ഗർത്തം രൂപപ്പെട്ടിരിക്കുന്നത്. ഗർത്തത്തിനുള്ളിൽ ലോഹങ്ങളോ മറ്റ് മെറ്റലുകളുടെ സാന്നിധ്യമോ ഇതുവരെ കണ്ടെത്തിയിട്ടില്ല. എന്നാൽ ജലാംശത്തിന്റെ സാന്നിധ്യമുണ്ടെന്ന് ഗവേഷകർ സ്ഥിരീകരിച്ചു.
മേഖലയിൽ നേരത്തെ സമാന രീതിയിലുള്ള ഗർത്തങ്ങൾ രൂപപ്പെട്ടതായി റിപ്പോർട്ടുകളില്ല. അതേസമയം ഖനന പ്രവർത്തനങ്ങളുടെ പ്രത്യാഘാതമായാണ് ഇത്തരത്തിലുള്ള ഗർത്തം രൂപപ്പെടുന്നതെന്ന് ആരോപണങ്ങൾ ഉയരുന്നുണ്ട്. സംഭവത്തിൽ വിശദമായ അന്വേഷണം പുരോഗമിക്കുകയാണ്.
Comments