കോട്ടയം: ജില്ലയിൽ മഴ തുടരുന്ന സാഹചര്യത്തിൽ കോട്ടയത്തെ വിദ്യാഭ്യാസ സ്ഥാപനങ്ങൾക്ക് ഓഗസ്റ്റ് 4 വ്യാഴാഴ്ച കളക്ടർ അവധി പ്രഖ്യാപിച്ചു. പ്രൊഫഷണൽ കോളജുകൾ, അങ്കണവാടികൾ ഉൾപ്പെടെയുള്ള മുഴുവൻ വിദ്യാഭ്യാസ സ്ഥാപനങ്ങൾക്കുമാണ് അവധി നൽകിയിരിക്കുന്നത്. കഴിഞ്ഞ ദിവസങ്ങളെ അപേക്ഷിച്ച് മഴ കുറവാണെങ്കിലും പലയിടങ്ങളിലും വെള്ളക്കെട്ടുകൾ നിലനിൽക്കുന്നുണ്ട്. ജില്ലകളിലെ നദികളിലും ജലനിരപ്പ് ഉയർന്നു തന്നെയാണ്. മലയോര മേഖലകളിൽ മഴ ശക്തമായാണ് തുടരുന്നത്.
അതേസമയം, സംസ്ഥാനത്ത് വരും ദിവസങ്ങളിലും ശക്തമായ മഴ തുടരുമെന്നാണ് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്. കേരളത്തിന് മുകളിലായി നിലനിൽക്കുന്ന അന്തരീക്ഷ ചുഴിയും, തെക്കൻ ആന്ധ്രാപ്രദേശിനും വടക്കൻ തമിഴ്നാടിനും സമീപത്തായി മദ്ധ്യ പടിഞ്ഞാറൻ ബംഗാൾ ഉൾക്കടലിൽ നിലനിൽക്കുന്ന ചക്രവാത ചുഴിയുമാണ് മഴയ്ക്ക് കാരണമാകുന്നത്.
നിലവിൽ ഒരു ജില്ലയിലും റെഡ് അലർട്ട് നൽകിയിട്ടില്ല. തിരുവനന്തപുരം, കൊല്ലം, കാസർകോട് ജില്ലകളൊഴികെ മറ്റ് ജില്ലകളിലെല്ലാം ഓറഞ്ച് അലർട്ട് പ്രഖ്യാപിച്ചിട്ടുണ്ട്. രാവിലെ ചില ജില്ലകളിൽ റെഡ് അലർട്ട് ഉണ്ടായിരുന്നെങ്കിലും കനത്ത മഴയ്ക്ക് ശമനമായതോടെ റെഡ് അലർട്ട് പിൻവലിക്കുകയായിരുന്നു. ഒറ്റപ്പെട്ടയിടങ്ങളിൽ രാത്രിയും നാളെയും അതിശക്തമായ മഴക്കുള്ള സാധ്യതയും പ്രവചിച്ചിച്ചിട്ടുണ്ട്.
Comments