ബർമിങ്ങാം: കോമൺവെൽത്ത് ഗെയിംസിനിടെ രണ്ട് ശ്രീലങ്കൻ താരങ്ങളെ കാണാതായി. ഒരു ജൂഡോ താരത്തെയും ഒരു റെസ്ലിംഗ് താരത്തെയും ഒരു ടീം ഒഫീഷ്യലിനെയുമാണ് കാണാതായത്. ഇവർക്കായി തിരച്ചിൽ തുടരുകയാണ്.
ഇതോടെ, ശ്രീലങ്കൻ കായിക താരങ്ങളോടും ഒഫീഷ്യലുകളോടും പാസ്പോർട്ടുകൾ സമർപ്പിക്കാൻ ടീം അധികൃതർ ആവശ്യപ്പെട്ടു. ശ്രീലങ്കയിൽ നിന്നും 51 ഒഫീഷ്യലുകൾ ഉൾപ്പെടെ 161 അംഗ സംഘമാണ് കോമൺവെൽത്ത് ഗെയിംസിന് എത്തിയിരിക്കുന്നത്.
കാണാതായ സംഘാംഗങ്ങൾ യു കെ അതിർത്തി കടക്കാൻ സാദ്ധ്യത ഇല്ലെന്നും അവരെ ഉടൻ കണ്ടെത്തുമെന്നും പോലീസ് അറിയിച്ചതായി ശ്രീലങ്കൻ ടീം വ്യക്തമാക്കി. കാണാതായ ജൂഡോ താരം വനിതയാണ് എന്നാണ് റിപ്പോർട്ട്.
ബർമിങ്ങാം നഗരത്തിന് സമീപത്തെ കവൻട്രി അരീനയിലാണ് ജൂഡോ, റെസ്ലിംഗ് മത്സരങ്ങൾ നടക്കുന്നത്. ശ്രീലങ്കയിലെ കടുത്ത സാമ്പത്തിക പ്രതിസന്ധിയെ അതിജീവിച്ച് കഠിനമായ സാഹചര്യങ്ങൾ തരണം ചെയ്താണ് താരങ്ങൾ യു കെയിൽ എത്തിയിരിക്കുന്നത്.
