തിരുവനന്തപുരം: ഡീസൽ പ്രതിസന്ധി പരിഹരിക്കാൻ ഓർഡിനറി സർവീസുകൾ വെട്ടിക്കുറച്ച് കെഎസ്ആർടിസി. ഈ സാഹചര്യത്തിൽ ഫാസ്റ്റ് പാസഞ്ചർ മുതലുള്ള സൂപ്പർ ക്ലാസ് സർവീസുകൾ വർധിപ്പിക്കാനാണ് നീക്കം. ഞായറാഴ്ച പൂർണമായും ഓർഡിനറി ബസുകൾ നിർത്തിവെക്കും.
ഡീസൽ പ്രതിസന്ധിയുടെ ഭാഗമായി വയനാട്ടിലെ കൽപ്പറ്റ, മാനന്തവാടി ഡിപ്പോകളിൽ നിന്നുള്ള സർവീസുകൾ ഇന്ന് റദ്ദാക്കിയിരുന്നു. സംസ്ഥാന വ്യാപകമായി പകുതിയിലധികം സർവീസുകൾ റദ്ദാക്കിയിട്ടുണ്ടെന്നാണ് വിവരം. ഓർഡിനറി സർവീസുകളാണ് നിലവിൽ വെട്ടിക്കുറച്ചിരിക്കുന്നത്. നാളെ 25 ശതമാനം ഓർഡിനറി സർവീസ് ബസുകൾ മാത്രമേ സർവീസ് നടത്തൂവെന്നും കെഎസ്ആർടിസി അറിയിച്ചിട്ടുണ്ട്.
ശമ്പള പ്രതിസന്ധിയ്ക്ക് പിന്നാലെ ഡീസൽ ക്ഷാമവും രുക്ഷമായതോടെ കടുത്ത പ്രതിസന്ധിലായിക്കുകയാണ് മാനേജ്മെന്റ്. എണ്ണക്കമ്പനികൾക്ക് നൽകേണ്ട കുടിശ്ശിക തുക വൻ തോതിൽ വർദ്ധിച്ചതോടെയാണ് ഡീസൽ പ്രതിസന്ധിയിലേക്ക് നയിച്ചത്. കുടിശ്ശിക ഇനത്തിൽ 135 കോടി രൂപ എണ്ണ കമ്പനികൾക്ക് നാൽകാനുണ്ടെന്നാണ് റിപ്പോർട്ട്.
