വാഷിംഗ്ടൺ: വനിതാ സൈനിക ഉദ്യോഗസ്ഥർക്ക് പ്രത്യേക അടിവസ്ത്രം വികസിപ്പിച്ച് അമേരിക്കൻ സൈന്യം.വനിതാ സൈനികർക്ക് കൂടുതൽ സംരക്ഷണവും പ്രവർത്തനക്ഷമതയും നൽകുന്നതിനായിട്ടാണ് പുതിയ അടിവസ്ത്രം രൂപകൽപ്പന ചെയ്തിരിക്കുന്നത്.
ആർമി ടാക്റ്റിക്കൽ ബ്രേസിയർ എന്ന അടിവസ്ത്രങ്ങളാണ് വനിതാ സൈനികർക്കായി തയ്യാറാക്കുന്നത്. മസാച്യുസെറ്റ്സിലെ നാറ്റികിലുള്ള യുഎസ് ആർമി കോംപാറ്റ് കേപ്പബിലിറ്റീസ് ഡെവലപ്പ്മെന്റ് കമാൻഡ് സോൾജ്യർ സെന്ററാണ് ഇത് വികസിപ്പിച്ചത്. ഇതിന് സൈന്യം അംഗീകാരം നൽകിയാൽ പുതിയ അടിവസ്ത്രം ഔദ്യോഗികമായി സൈനിക യൂണിഫോമിന്റെ ഭാഗമാകുമെന്നാണ് വിവരങ്ങൾ.
വിവിധ ശരീര ഘടനകൾക്കനുസരിച്ച് ഉപകരണങ്ങളും യൂണിഫോമും വീണ്ടും രൂപകൽപന ചെയ്യുന്നതിന്റെ ഭാഗമായാണ് ഇത് രൂപകൽപന ചെയ്യുന്നത്.യുഎസ് സൈനിക ചരിത്രത്തിൽ വനിതാ സൈനികർക്ക് നിർദേശിക്കപ്പെടുന്ന ആദ്യ ഔദ്യോഗിക യൂണിഫോം ബ്രായാണ് ഇത്.
2022 അവസാനത്തോടെ സൈനിക യൂണിഫോമിലേക്കുള്ള അടിവസ്ത്രത്തിന്റെ അന്തിമ ഡിസൈൻ ആശയങ്ങൾ തങ്ങളുടെ ഡിസൈൻ ടീമംഗങ്ങൾ അവതരിപ്പിക്കുമെന്ന് സോൾജ്യർ സെന്റർ വക്താവ് ഡേവിഡ് ആക്സെറ്റ വ്യക്തമാക്കി. വസ്ത്രത്തിന്റെ രൂപകൽപ്പനയുമായി ബന്ധപ്പെട്ട് സൈന്യത്തിൽ വിവിധ മേഖലകളിൽ പ്രവർത്തിക്കുന്ന വനിതാ സൈനികർക്കിടയിൽ സർവേ നടത്തിയിരുന്നുവെന്നും അദ്ദേഹം വ്യക്തമാക്കി.
