രാജ്യത്തെ സമ്പൂർണ്ണ ഖാദി ദേശീയ പതാക സ്വപ്നം കാണുന്ന ഗാന്ധിയൻ അയ്യപ്പനെ ചേർത്തു പിടിച്ച് മുൻ എംപിയും നടനുമായ സുരേഷ് ഗോപി. രാജ്യസ്നേഹവും ജീവിതാഭിലാഷവുമാണ് ഗാന്ധിയൻ അയ്യപ്പന് സമ്പൂർണ്ണ ഖാദി പതാക എന്നത്. ചർക്കയിൽ നെയ്തെടുത്ത ഖാദി പതാക ഭാരതത്തിൽ ഉയർത്തണമെന്ന് ആഗ്രഹിക്കുന്ന തികഞ്ഞ ഗാന്ധിയനാണ് അയ്യപ്പൻ. അദ്ദേഹത്തിന്റെ ഈ ഒരു ആഗ്രഹം ജനങ്ങളുടെ മുന്നിൽ അവതരിപ്പിച്ചത് ആർജെ അഞ്ജലിയാണ്.
രാഷ്ട്രത്തിന് ഇതുവരെ ഒരു പൂർണ്ണ പതാക ഇല്ല. ഭാരതത്തിന്റെ അഭിമാനമായി ചർക്കയിൽ നെയ്തെടുത്ത പതാക ഉയർത്തണമെന്നാണ് തന്റെ ആഗ്രഹം. 7 വർഷമെടുത്തു ഗാന്ധിയൻ അയ്യപ്പൻ ദേശീയ പതാക തുന്നിയെടുക്കാൻ. സുരേഷ് ഗോപി എംപി വഴി പ്രധാനമന്ത്രിയുടെ ഓഫീസിൽ പതാക എത്തിക്കുകയും ചെയ്തിരുന്നു. എന്നാൽ അളവിൽ വ്യത്യാസം വരുത്താൻ നിർദ്ദേശിച്ചതോടെ വീണ്ടും തന്റെ ആഗ്രഹത്തിന്റെ പിന്നിൽ കഠിനമായി പ്രവർത്തിക്കുകയാണ് അയ്യപ്പൻ. ഓഗസ്റ്റ് 15 ന് രാജ്യം സ്വാതന്ത്ര്യ ദിനം ആഘോഷിക്കുമ്പോൾ ഭാരതത്തിൽ എല്ലായിടത്തും നെയ്തെടുത്ത പതാക ഉയർത്തണമെന്നായിരുന്നു അദ്ദേഹത്തിന്റെ ആഗ്രഹം.
ഗാന്ധിയൻ അയ്യപ്പൻ തുന്നിയെടുത്ത ദേശീയ പതാകകൾ വാങ്ങണമെന്നും സ്വാതന്ത്ര്യദിനത്തിൽ അവ ഉയർത്തി അദ്ദേഹത്തിന്റെ ആഗ്രഹം നടത്തി കൊടുക്കണമെന്നും വീഡിയോയിലൂടെ ആർജെ അഞ്ജലി ആവശ്യപ്പെട്ടിരുന്നു. പലർക്കും വീഡിയോ ടാഗ് ചെയ്തു, നിരവധിപേർ വീഡിയോ ഷെയർ ചെയ്തുവെങ്കിലും ആരും തന്നെ ബന്ധപ്പെട്ടില്ല. എന്നാൽ മലയാളികൾക്ക് എന്നും കൈത്താങ്ങാകുന്ന സുരേഷ് ഗോപി എന്ന പച്ചയായ മനുഷ്യൻ വീഡിയോ കണ്ടതോടെ അഞ്ജലിയെ ഫോൺ ചെയ്യുകയായിരുന്നു.
അയ്യപ്പൻ ചേട്ടനെകൊണ്ട് പതാകയുമായി വീട്ടിലെത്തണം എന്നാണ് സുരേഷ് ഗോപി പറഞ്ഞത്. താൻ വീട്ടിലില്ലെന്നും രാധികയുടെ കൈയ്യിൽ പാതാക ഏൽപ്പിക്കണമെന്നും പറഞ്ഞ നടൻ, അയ്യപ്പൻ ചേട്ടന്റെ കൈയ്യിൽ എത്ര പതാകയുണ്ടോ അത് മുഴുവനും വാങ്ങിക്കൊള്ളാമെന്നും പറഞ്ഞു. ദേശീയ പതാകയുമായി എത്തി ഗാന്ധിയൻ അയ്യപ്പനെ കാൽതൊട്ട് വന്ദിച്ചാണ് ഭാര്യ രാധിക സ്വീകരിച്ചത്. ഇനി ഗാന്ധിയൻ അയ്യപ്പന്റെ ആഗ്രഹം താൻ വർഷങ്ങളായി ചർക്കയിൽ തുന്നിയെടുത്ത ദേശീയ പതാക ഭാരതത്തിൽ ഉയരണമെന്നതാണ്. ആ ആഗ്രഹത്തിനുവേണ്ടി മരിക്കും വരെ പരിശ്രമിക്കുമെന്നും അദ്ദേഹം പറയുന്നു.
Comments