ഇടുക്കി: ഇടുക്കി ഡാമിലും മുല്ലപ്പെരിയാർ ഡാമിലും ജലനിരപ്പ് ഉയരുന്നു. വൃഷ്ടി പ്രദേശങ്ങളിൽ മഴ പെയ്യുന്നതിനെ തുടർന്ന് ഇരു ഡാമുകളിലേയ്ക്കും നീരൊഴുക്ക് ശക്തമാണ്. ഇടുക്കിയിൽ 2386.86 ആയി ജലനിരപ്പ് ഉയർന്നിട്ടുണ്ട്. 139.55 ആണ് മുല്ലപ്പെരിയാറിലെ ജലനിരപ്പ്. ജലനിരപ്പ് കുറയാത്ത സാഹചര്യത്തിൽ മുല്ലപ്പെരിയാർ അണക്കെട്ടിന്റെ മുഴുവൻ ഷട്ടറുകളും തുറക്കും. നിലവിൽ തുറന്നിരിക്കുന്നത് 10 ഷട്ടറുകളാണ്. ജലനിരപ്പ് ഉയരുന്നതിന്റെ പശ്ചാത്തലത്തിൽ അവശേഷിക്കുന്ന മൂന്ന് ഷട്ടറുകൾ കൂടി തുറക്കാനാണ് തീരുമാനം.
മൂന്ന് ഷട്ടറുകൾ 30 സെന്റിമീറ്റർ വീതമായിരിക്കും തുറക്കുക. ഇതോടെ ആകെ 8626 ക്യുമെക്സ് ജലം പുറത്തേക്കൊഴുക്കും. ഇടുക്കിയിൽ നിന്ന് കൂടുതൽ വെള്ളം എത്തിയ പശ്ചാത്തലത്തിൽ ലോവർ പെരിയാർ ഡാമിന്റെ രണ്ട് ഷട്ടർ കൂടി തുറന്നിട്ടുണ്ട്. ഇടുക്കിയുടെ ചെറുതോണി അണക്കെട്ടിൽനിന്ന് സെക്കൻഡിൽ 2.60 ലക്ഷം ലിറ്റർ (260 ക്യുമെക്സ്) വെള്ളമാണ് ലോവർ പെരിയാർ ഡാമിലെത്തുന്നത്. ഇടുക്കിയിൽ നിന്ന് ഒഴുക്കുന്ന വെള്ളത്തിന്റെ അളവ് കൂടിയതോടെ തടിയമ്പാട് നാലു വീടുകളിൽ വെള്ളം കയറി.ഒരു വീടിന്റെ മതിലിടിഞ്ഞു.
നിലവിൽ മൂന്ന് ലക്ഷം ലീറ്റർ വെള്ളമാണ് സെക്കന്റിൽ ഒഴുക്കുന്നത്. പത്ത് മണിയോടെ കൂടുതൽ വെളളം ഒഴുക്കാൻ ഇന്നലെ തന്നെ തീരുമാനിച്ചിരുന്നു. മുഴുവൻ ഷട്ടറുകളും ഉയർത്തിയിട്ടും ഇടുക്കി അണക്കെട്ടിൽ ജലനിരപ്പ് കൂടുകയാണ്. അതേസമയം, രാവിലെ 10 മണിയ്ക്ക് എറണാകുളം ഇടമലയാർ ഡാം തുറക്കും. ഇടുക്കിക്കൊപ്പം ഇടമലയാർ ഡാമിൽ നിന്നുള്ള വെള്ളം കൂടിയെത്തുന്നതോടെ പെരിയാറിൽ ജലനിരപ്പുയരും.
