തിരുവനന്തപുരം: സഖാക്കൾ ഓടി നടന്ന് ബഹിഷ്‌കരിക്കാൻ ആവശ്യപ്പെട്ട ‘ന്നാ താൻ കേസ് കൊട്’ എന്ന കുഞ്ചാക്കോ ബോബൻ ചിത്രത്തിന്റെ പരസ്യം ആദ്യ പേജിൽ തന്നെ പ്രസിദ്ധീകരിച്ച് ദേശാഭിമാനി. ഇന്നലെ പുറത്തിറങ്ങിയ പത്രത്തിലാണ് സിനിമയുടെ പരസ്യവും അച്ചടിച്ചു വന്നത്. സിനിമ ബഹിഷ്‌കരിക്കാനായി സൈബർ സഖാക്കൾ ആഹ്വാനം ചെയ്യുന്നതിനിടെയായിരുന്നു ഇതെല്ലാം പൊളിച്ചടുക്കി പാർട്ടി പത്രം പരസ്യം പ്രസിദ്ധീകരിച്ചത്. ഇതോടെ സഖാക്കൾക്ക് ഉത്തരം മുട്ടി.
സിനിമ ബഹിഷ്‌കരിക്കാൻ ആഹ്വാനം ചെയ്തുകൊണ്ടുള്ള സഖാക്കളുടെ പോസ്റ്റുകൾക്ക് പിന്നാലെ ദേശാഭിമാനി പത്രത്തിലെ പരസ്യവും സമൂഹമാദ്ധ്യമങ്ങളിൽ വ്യാപകമായി പ്രചരിച്ചിരുന്നു. പത്രത്തിന്റെ സ്‌ക്രീൻ ഷോട്ടുകൾ ഉൾപ്പെടെയാണ് വ്യാപകമായി പ്രചരിച്ചത്. ദേശാഭിമാനി കാശ് വാങ്ങി പരസ്യം പ്രസിദ്ധീകരിച്ചെന്നും, കമ്മി അടിമകൾ ബഹിഷ്‌കരണാഹ്വാനവുമായി നടക്കുകയാണെന്നുമായിരുന്നു സമൂഹ മാദ്ധ്യമങ്ങളിൽ പ്രചരിച്ചത്. സർക്കാരിനെ പരിഹസിച്ചുകൊണ്ടുള്ള പരസ്യം പ്രസിദ്ധീകരിക്കാൻ ദേശാഭിമാനി കാണിച്ച ധൈര്യം അപാരമാണെന്നും ചിലർ നർമ്മ രൂപേണ പറഞ്ഞിരുന്നു. പരസ്യം ഒരു സർക്കാരിനും എതിരല്ലെന്ന കുഞ്ചാക്കോ ബോബന്റെ പ്രതികരണം അതീവ പ്രാധാന്യത്തോടെ ദേശാഭിമാനിയുടെ ഓൺലൈൻ വിഭാഗവും നൽകിയിരുന്നു.
പരസ്യത്തിലെ കുഴിയെ പരാമർശിച്ചുകൊണ്ടുള്ള വാചകം ആണ് സഖാക്കളെ ചൊടിപ്പിച്ചത്. തിയറ്ററിലേക്കുള്ള വഴിയിൽ കുഴിയുണ്ടാകും, എന്നാലും വരണേ എന്നായിരുന്നു പരസ്യവാചകം. ഇത് കണ്ടതോടെ സഖാക്കൾ സിനിമ സർക്കാരിനെതിരാണെന്ന് വിമർശിച്ച് രംഗത്തുവരികയായിരുന്നു. കുഞ്ചാക്കോ ബോബന് നേരെയും സഖാക്കളുടെ സൈബർ ആക്രമണം ഉണ്ടായിരുന്നു.
