ഇന്ന് ലോക ആന ദിനം. ഭൂമിയിൽ ആനകൾക്കുള്ള പ്രാധാന്യത്തെക്കുറിച്ച് പഠിക്കാനും അവ സംരക്ഷിക്കപ്പേടേണ്ടതിനെപ്പറ്റി ചർച്ച ചെയ്യാനുമാണ് ഈ ദിനം ആചരിക്കുന്നത്. 2011 മുതലാണ് ഓഗസ്റ്റ് 12 ആന ദിനമായി ആഘോഷിക്കുന്നത്.
ലക്ഷണമൊത്ത കൊമ്പുകളുള്ള ആനകൾ എന്നും മലയാളിക്ക് ഒരു ആകർഷണമാണ്. കൊമ്പുകളുടെ വലിപ്പം വെച്ച് തന്നെ അവയെ വേർതിരിച്ചറിയാനാകും. കരയിലെ ഏറ്റവും വലിയ ജീവി എന്ന വിശേഷണവും ആനയ്‌ക്ക് തന്നെയാണ്. മലയാളികൾക്ക് ആനയില്ലാതെ, പൂരം എന്ന് ഒരു ആഘോഷം സങ്കൽപ്പിക്കാൻ പോലും സാധിക്കില്ല. എന്നാൽ നാട്ടാനകളുടെ എണ്ണം കുറഞ്ഞുകൊണ്ടിരിക്കുകയാണെന്നാണ് റിപ്പോർട്ടുകൾ വ്യക്തമാക്കുന്നത്.
30 വർഷത്തിന് ശേഷം ഉത്സവങ്ങളിൽ പങ്കടുപ്പിക്കാൻ പോലും ആനകൾ ഉണ്ടാവില്ലെന്നാണ് ഇത് വ്യക്തമാക്കുന്നത്. കേരളത്തിലെ 70 ശതമാനം ആനകളും 50 വയസ്സിന് മുകളിൽ പ്രായമുള്ളവരാണ്. കൊമ്പന്മാരുടെ ആയുസ്സ് പരമാവധി 80 വയസ്സാണ്. എന്നാൽ ചില ആനകൾ പ്രായം തികയുന്നതിന് മുൻപ് തന്നെ രോഗങ്ങൾ ബാധിച്ച് മരിക്കുന്നു. ഇങ്ങനെ പോയാൽ മൂപ്പത് വർഷത്തിന് ശേഷം കാണാൻ പോലും ഒരു നാട്ടാന ഉണ്ടാകില്ല.
1972ലെ വന്യജീവി സംരക്ഷണനിയമത്തിൽ ആനപിടിത്തം നിരോധിച്ചതും 2002-ൽവന്ന ഭേദഗതിയിൽ ആനവിൽപ്പന നിരോധിച്ചതുമാണ് നാട്ടാനകൾ ഇല്ലാതാകുന്ന അവസ്ഥയ്‌ക്ക് കാരണം. മെരുക്കിയെടുക്കുന്നതിന്റെ ഭാഗമായി കാട്ടാനയ്‌ക്ക് നേരിടേണ്ടി വരുന്ന അതിക്രൂരമായ പീഡനങ്ങളാണ് ഇതിന്റെ പ്രധാനകാരണം. ആനവേട്ട നടത്തി കൊമ്പും നഖവും മുറിച്ചെടുത്ത് വിൽക്കുന്നതും വർദ്ധിച്ചതോടെയാണ് ആനപിടിത്തം നിരോധിച്ചത്.
കേരളത്തിലെ ആന ഉടമകളുടെ കൈയ്യിൽ കൊമ്പനാനകളാണ് കൂടുതലും. അതിനാൽ വംശവർദ്ധനയ്‌ക്കുള്ള സാധ്യതകളും കുറവാണ്. ഒരു ആനയെ നോക്കാൻ ദിവസം 5000 രൂപ ചിലവാകും. ആന പരിപാലത്തിലെ സങ്കീർണതകൾ ഉടമകളെ ബുദ്ധിമുട്ടിലാക്കുന്നുണ്ട്. ഇതെല്ലാം കൊണ്ട് തന്നെ ഈ മേഖലയിലേക്ക് വരാൻ ഇന്ന് ആരും മുതിരുന്നില്ല.
