ജയ്പൂർ: രക്ഷാബന്ധൻ ദിനത്തിൽ വീരമൃത്യുവരിച്ച സഹോദരന്റെ പ്രതിമയിൽ രാഖി കെട്ടി സഹോദരി. രാജസ്ഥാൻ സ്വദേശി ഗൺപത് രാം കദ്വാസിന്റെ സഹോദരിയാണ് അദ്ദേഹത്തിന്റെ പ്രതിമയിൽ രാഖി കെട്ടിയത്. ഓരോ ഇന്ത്യക്കാരനും അഭിമാനമാകുന്ന ചിത്രം ലിങ്ക്ഡ് ഇൻ ചെയർമാൻ വേദാന്ത ബിർലയാണ് സമൂഹമാദ്ധ്യമത്തിൽ പങ്കുവെച്ചത്.
ജമ്മു കശ്മീരിൽ ഭീകരരുമായി ഉണ്ടായ ഏറ്റുമുട്ടലിലാണ് ഗൺപത് വീരമൃത്യുവരിച്ചത്. പിന്നീട് അദ്ദേഹത്തോടുള്ള ആദര സൂചകമായി പ്രദേശത്ത് പ്രതിമ സ്ഥാപിക്കുകയായിരുന്നു. എല്ലാ രക്ഷ ബന്ധൻ ദിനത്തിലും ഗൺപതിന്റെ സഹോദരി അദ്ദേഹത്തിന്റെ കയ്യിൽ രാഖി കെട്ടി നൽകുമായിരുന്നു. 2017 ലെ ഏറ്റുമുട്ടലിലായിരുന്നു ഗൺപത് വീരമൃത്യുവരിച്ചത്.
വൈകാരികമായ കുറിപ്പോടെയാണ് വേദാന്ത ബിർല ചിത്രം പങ്കുവെച്ചത്. ഇന്ത്യയെ മഹത്തരമാക്കുന്നത് ഇത്തരത്തിലുള്ള കാര്യങ്ങളാണെന്ന് ചിത്രം പങ്കുവെച്ചുകൊണ്ട് അദ്ദേഹം സമൂഹമാദ്ധ്യമത്തിൽ കുറിച്ചു. സന്തോഷത്തിന്റെയും അതേസമയം അഭിമാനത്തിന്റെയും നിമിഷമാണ് ഇത്. സഹോദരനെ നഷ്ടമായതിലുള്ള വേദനയും, രാജ്യത്തിനായി ജീവത്യാഗം നൽകിയ സഹോദരനെക്കുറിച്ചുള്ള അഭിമാനവും. രക്ഷാബന്ധൻ ദിനത്തിൽ വൈകാരികമായ നിമിഷങ്ങളിലൂടെയാകും ആ സഹോദരി കടന്നു പോകുന്നുണ്ടാകുക. ഒരിക്കലും അവൾക്ക് അവളുടെ സഹോദരന്റെ കയ്യിൽ രാഖി കെട്ടാതിരിക്കാൻ കഴിയില്ല. അതുകൊണ്ടാണ് പ്രതിമയുടെ കയ്യിൽ രാഖി കെട്ടിയതെന്നും അദ്ദേഹം വ്യക്തമാക്കുന്നു. വേദാന്ത ബിർലയുടെ പോസ്റ്റിന് താഴെ നിരവധി പേരാണ് വൈകാരിക പ്രതികരണവുമായി രംഗത്ത് എത്തിയത്.
